Pharmed
TYLOL HOT D N12 PAKET
TAYLOL HOT D
TAYLOL HOT D Tərkibi
Təsiredici maddələr: 1 paketdə 500 mq parasetamol, 4 mq xlorfeniramin maleat, 60 mq psevdoefedrin
hidroxlorid vardır.
Köməkçi maddələr: susuz limon turşusu, çaxır turşusu, natrium hidrokarbonat (natrium bikarbonat),
susuz natrium karbonat, povidon (PVP K 30), natrium benzoat, xinolin sarısı CI
No:47005, portağal tozu aromatizatoru, laktoza monohidrat, "günəş qürubu" sarısı,
kalium asesulfam, aspartam.
Farmakoterapevtik qrupu
Digər soyuqdəymə əleyhinə preparatlar.
ATC kodu: R05X.
Farmakoloji xüsusiyyətləri
Farmakodinamikası:
Tərkibinə parasetamol, xlorfeniramin maleat və psevdoefedrin hidroxlorid daxil olduğuna görə Taylol®
Hot D ağrıkəsici, qızdırmasalıcı, antihistamin və dekongestant xüsusiyyətlərinə malikdir.
Parasetamolun ağrıkəsici təsiri əsasən mərkəzi sinir sistemində prostaqlandin sintezinin inhibə edilməsi
və nisbətən zəif dərəcədə periferik təsirlə – ağrı impulsunun yaranmasının blokada edilməsi ilə
əlaqələndirilir. Periferik təsir həmçinin prostaqlandin sintezinin və ya ağrı reseptorlarını mexaniki və ya
kimyəvi stimulyasiyaya sensibilizə edən digər maddələrin sintezinin və ya təsirinin inhibə edilməsi ilə
bağlı ola bilər.
Parasetamolun qızdırmasalıcı təsirinin hipotalamik istilik tənzimləyici mərkəzə təsir göstərməsi və
periferik qan damarlarının genişlənməsi (dəridə qan axınını artırır, tərləmə və istilik itkisinə səbəb olur)
nəticəsində yarandığı ehtimal olunur. Mərkəzi təsirin hipotalamusda prostaqlandin sintezinin inhibə
edilməsi ilə əlaqədar olduğu hesab edilir.
Xlorfeniramin H1 histamin reseptorlarının güclü antaqonistidir. Antihistaminlər toxumalarda H1 histamin
reseptorlarının rəqabətli geriyədönən blokadası ilə histaminin orqanizmə təsirini zəiflədir. Xlorfeniramin
allergiya əleyhinə təsir göstərir, histaminin saya əzələlərə təsirini inhibə edir, kapillyar keçiriciliyi və
nəticədə ödemi azaldır. Xlorfeniramin həmçinin antixolinergik təsirə malikdir.
Psevdoefedrin birbaşa və ya dolayı yolla adrenergik reseptorlara təsir göstərən simpatomimetik vasitədir.
O, α- və β-adrenergik təsirə və mərkəzi sinir sistemi üzərində bir sıra stimulyasiyaedici təsirlərə malikdir.
Psevdoefedrinin simpatomimetik təsiri damar daralması ilə nəticələnir ki, bu da öz növbəsində burun
tutulmasını yüngülləşdirir.
Farmakokinetikası:
Absorbsiyası (sorulması):
Parasetamol mədə-bağırsaq traktından birbaşa absorbsiya olunur və qəbuldan sonra 30 dəqiqə - 2 saat
ərzində plazmada maksimal konsentrasiyaya çatır.
Xlorfeniramin maleat peroral qəbuldan sonra birbaşa mədə-bağırsaq traktından absorbsiya olunur. Təsiri
30 dəqiqə ərzində baş verir, 1-2 saat ərzində maksimal həddə çatır və 4-6 saat ərzində davam edir.
Psevdoefedrin mədə-bağırsaq traktından birbaşa və tam absorbsiya olunur.
Paylanması:
Parasetamolun plazma zülalları ilə birləşməsi adi terapevtik konsentrasiyalarda cüzidir, lakin
konsentrasiya artdıqca artır. Xlorfeniramin maleat plazma zülalları ilə əhəmiyyətli dərəcədə birləşir.
Psevdoefedrin bədəndə sürətlə paylanır, paylanma həcminin bədən çəkisinə nisbəti 2-3 l/kq-dır.
Biotransformasiyası:
Parasetamol qaraciyərdə metabolizm olunur və əsasən qlükuronid və sulfat konyuqatları şəklində sidiklə
ifraz olunur. Yarımxaricolma dövrü 1-4 saat arasında dəyişir. Parasetamolun qarışıq funksiyalı
oksidazalarla qaraciyərdə çox az miqdarda yaranan və adətən qaraciyər qlütationu ilə konyuqasiya
olunaraq neytrallaşan kiçik hidroksilləşmiş metaboliti doza həddi aşıldıqda toplana və qaraciyəri zədələyə
bilər.
Xlorfeniramin maleat, əsasən, qaraciyərdə inaktivasiya olunur və metabolitlər şəklində sidiklə ifraz
olunur. Xlorfeniramin monodesmetil və didesmetil törəməsinə metabolizm olunur. Plazmadan
yarımxaricolma dövrü 12-15 saat təşkil edir.
Psevdoefedrin monoaminoksidaza ilə metabolizmə qarşı davamlıdır. Psevdoefedrinin yarımxaricolma
dövrü 5-8 saat arasıdır, lakin sidiklə xaric olduğu üçün yarımxaricolması pH dərəcəsindən asılıdır.
Xaric olması:
Parasetamolun 5%-dən az miqdarı dəyişilməmiş parasetamol şəklində ifraz olunur.
Xlorfeniramin maleatın peroral dozasının təqribən 22%-i sidiklə dəyişilməmiş şəkildə ifraz olunur.
Nəcisdə yalnız cüzi miqdarda tapılmışdır.
Psevdoefedrin, əsasən, dəyişilməmiş şəkildə sidiklə ifraz olunur.
İstifadəsinə göstərişlər
Taylol Hot D aşağıda göstərilən simptomlar ilə müşayiət olunan qrip və soyuqdəymənin, eləcə də yuxarı
tənəffüs yolları xəstəliklərinin simptomatik müalicəsi üçün istifadə olunur:
- Halsızlıq
- Hərarət və baş ağrısı
- Burun axması
- Burun tutulması
- Asqırma
- Yüngül ağrı halları
Əks göstərişlər
- Taylol Hot D preparatının tərkibində olan hansı bir maddəyə qarşı hiperhəssaslıq
- Ağır qaraciyər və böyrək xəstəlikləri
- Ürək-damar xəstəlikləri, o cümlədən hipertenziya və periferik damar xəstəliyi
- Şəkərli diabet
- Feoxromositoma
- Hipertiroidizm
- Qapalı bucaqlı qlaukoma və ya gözdaxili təzyiqin yüksəlməsi
- Prostat vəzinin hipertrofiyası
- Digər simpatomimetik dekongestantların yanaşı istifadəsi
- β-Blokatorlarla müalicə
- Hal-hazırda və ya son 2 həftə ərzində MAO inhibitorları ilə müalicə
- Fenilketonuriya (tərkibində aspartam şəklində fenilalanin olduğu üçün)
- 12 yaşdan kiçik uşaqlar
Xüsusi göstərişlər və ehtiyat tədbirləri
Parasetamol:
Ağır böyrək çatışmazlığı və ya ağır qaraciyər çatışmazlığı olan xəstələrdə parasetamolun istifadəsi
zamanı ehtiyatlı olmaq lazımdır. Qaraciyərin alkoqol mənşəli qeyri-sirroz xəstəliyi olanlarda doza
həddinin aşılması daha təhlükəlidir. Qaraciyərə toksik təsir riskinə görə, alkoqol qəbul edən xəstələrdə
parasetamolun gündəlik dozası 2 qramdan artıq olmamalıdır.
Bu dərmanı qəbul edərkən tərkibində parasetamol olan başqa heç nə qəbul etmək olmaz.
Dərmanı həddindən artıq qəbul etdikdə həkimə müraciət etmək lazımdır. Çünki həddindən artıq
parasetamol daha sonra qaraciyərin ciddi zədələnməsinə səbəb ola bilər.
Parasetamol dəridə ağır reaksiyalara səbəb ola bilər. Dəridə dəridə qızartı, suluqlar və ya səpgi olduqda
preparatın istifadəsini dayandırmaq və dərhal tibbi yardım üçün müraciət etmək lazımdır.
Xlorfeniramin:
Xlorfeniramin antixolinergik təsirə malik digər dərman vasitələri kimi epilepsiya, prostat vəzinin
hipertrofiyası, ağır hipertenziya və ya ürək-damar xəstəliyi, bronxit, bronxoektaziya və ya astma,
qaraciyər çatışmazlığı və böyrək çatışmazlığı zamanı ehtiyatla istifadə olunmalıdır. Uşaqlarda və
yaşlılarda nevroloji antixolinergik təsirlərin və paradoksal həyəcanın (məs., enerjinin yüksəlməsi,
narahatlıq, əsəbilik) baş verməsi ehtimalı daha yüksəkdir.
Alkoqolun təsiri arta bilər, bu səbəbdən yanaşı istifadədən çəkinmək lazımdır.
Tərkibində antihistamin olan dərman vasitələri, o cümlədən tərkibində antihistamin olan öskürək və
soyuqdəymə əleyhinə dərman vasitələri ilə birgə istifadə olunmamalıdır.
Psevdoefedrin:
Tərkibində psevdoefedrin olan dərman vasitələrinin qəbulu zamanı dəridə kəskin generalizəolunmuş
ekzentematoz pustulyoz (KGEP) kimi ağır reaksiyalar baş verə bilər. Bu kəskin pustulyoz səpgilər
müalicənin ilk 2 günü ərzində qızdırma və geniş, ödemli eritemanın üzərində meydana çıxan və əsasən,
dəri qatları, bədən və yuxarı ətraflarda lokalizə olunmuş çoxsaylı kiçik, əsasən, qeyri-follikulyar
pustulalar şəklində baş verə bilər. Pasiyentlərə yaxından nəzarət olunmalıdır. Pireksiya, eritema və ya çox
sayda kiçik pustulalar kimi əlamət və simptomlar müşahidə olunduqda dərman vasitəsinin istifadəsi
dayandırılmalı və lazım gələrsə müvafiq tədbirlər görülməlidir.
Psevdoefedrinin istifadəsi ilə bağlı işemik kolit halları qeydə alınmışdır. Qəflətən başlayan qarın ağrısı,
düz bağırsaq qanaxması və işemik kolitin digər simptomları inkişaf etdikdə preparatın istifadəsini
dayandırmaq və tibbi yardım üçün müraciət etmək lazımdır.
Psevdoefedrinin istifadəsi ilə bağlı işemik optik neyropatiya halları qeydə alınmışdır. Qəflətən görmənin
itməsi və ya skotoma kimi görmə sahəsinin azalması halları baş verdikdə preparatın istifadəsini
dayandırmaq lazımdır.
Natrium:
Taylol Hot D preparatının tərkibində 450 mq natrium bikarbonat, 45 mq susuz natrium karbonat və 10
mq natrium benzoat vardır. Natrium pəhrizi saxlayan pasiyentlər bunu nəzərə almalıdırlar.
"Günəş qürubu" sarısı (Sunset yellow)
Taylol Hot D preparatının tərkibində rəngləyici vasitə olaraq sunset yellow (E110) olduğuna görə bəzi
insanlarda allergik reaksiyaların yaranmasının səbəbi ola bilər.
Laktoza:
Qalaktozaya qarşı dözümsüzlük, Lapp laktaza çatışmazlığı və ya qlükoza-qalaktoza malabsorbsiya
sindromu kimi irsi problemləri olan xəstələr bu dərmanı qəbul etməməlidir.
Taylol Hot D preparatının tərkibində şəkər olmadığı üçün aşağı kalorili pəhrizə riayət edən xəstələr
qəbul edə bilərlər.
Taylol Hot D preparatı təlimatda göstərilmiş dozadan artıq miqdarda qəbul edilməməlidir.
Digər dərman vasitələri ilə qarşılıqlı təsiri
Parasetamol:
Xolestiramin: Xolestiramin parasetamolun absorbsiya sürətini azaldır. Bu səbəbdən maksimal analgeziya
tələb olunduqda bir saat ərzində xolestiramin qəbul edilməməlidir.
Metoklopramid və domperidon: Metoklopramid və domperidon parasetamolun absorbsiyasını artırır.
Yanaşı istifadədən çəkinmək lazımdır.
Varfarin: qanaxma riski yüksək olan hallarda uzun müddət davamlı olaraq parasetamoldan istifadə
etdikdə, varfarin və digər kumarinlərin antikoaqulyant təsiri güclənə bilər; təsadüfi dozalar mühüm təsir
göstərmir.
Xloramfenikol: Xloramfenikolun qan plazmasında konsentrasiyası artır.
Antipsixotik vasitələrdən fenotiazinlərlə qarşılıqlı təsir göstərə bilər. Antiepileptik vasitələrə aid olan
karbamazepin, fenobarbital, fenitoin və ya primidon qəbul edən xəstələrdə parasetamolun dozası
azaldılmalıdır.
Xlorfeniramin:
Xlorfeniraminlə hipnotik və anksiolitik dərman vasitələrinin yanaşı istifadəsi sedativ təsirin artmasına
səbəb ola bilər. Mərkəzi sinir sisteminin fəaliyyətinə ləngidici təsir göstərən alkoqol, barbituratlar,
yuxugətirici vasitələr, opioid analgetiklər və antipsixotiklər kimi vasitələr xlorfeniraminlə birlikdə istifadə
edildikdə sinergistik təsir müşahidə oluna bilər. Buna görə xlorfeniramini bu dərman vasitələri ilə yanaşı
istifadə etməzdən əvvəl həkimlə məsləhətləşmək lazımdır.
Xlorfeniramin fenitoinin metabolizmini inhibə edir və fenitoin toksikliyi ilə nəticələnə bilər.
Xlorfeniraminin antixolinergik təsirləri monoaminoksidaza inhibitorları ilə güclənə bilər.
Psevdoefedrin:
Psevdoefedrin monoaminoksidaza inhibitorları ilə müalicə alan pasiyentlərə və ya bu cür müalicə
dayandırıldıqdan sonra 14 gün ərzində verilməməlidir.
Trisiklik antidepressantlar kimi antixolinergik dərman vasitələrinin təsirini gücləndirə bilər.
Üskükotu (digitalis) preparatları qəbul edən xəstələrdə aritmiya ehtimalını artıra bilər.
Çovdar mahmızı (erqot) alkaloidlərinin damardaraldıcı təsirini artıra bilər.
Dekongestantlar, iştahazaldıcı vasitələr və amfetamin tipli psixostimulyatorlarla birlikdə qəbul edildikdə
psevdoefedrin hidroxlorid arterial təzyiqin vaxtaşırı artmasına səbəb ola bilər.
Psevdoefedrin hidroxloridlə birlikdə qəbul edildikdə metildopa, α-adrenoblokatorlar, β-adrenoblokatorlar
və quanetidin kimi antihipertenziv vasitələrin təsiri azala bilər.
Taylol Hot D preparatı digər parasetamol tərkibli preparatlar ilə eyni zamanda istifadə edilməməlidir. Bu
parasetamolun tövsiyə olunan gündəlik dozasının artması ilə nəticələnə bilər. Taylol® Hot D preparatı
QSİƏV (asetilsalisil turşusu, naproksen, ibuprofen və s.) tərkibli digər qrip və soyuqdəymə əleyhinə
preparatlarla eyni zamanda istifadə edilməməlidir.
Hamiləlik və laktasiya dövründə istifadəsi
Hamiləlik:
Parasetamol:
Hamilə qadınlara dair çoxsaylı məlumatlarda dölün inkişafdan qalması, yaxud döl/yenidoğulmuş üçün
toksiklik qeyd olunmayıb. Klinik zərurət olduqda parasetamoldan hamiləlik müddətində istifadə oluna
bilər, lakin ən aşağı dozada, mümkün ən qısa zaman müddətində və mümkün ən aşağı tezlikdə istifadə
edilməlidir.
Xlorfeniramin:
Hamilə qadınlarda xlorfeniramin maleatın istifadəsi ilə bağlı adekvat məlumat yoxdur. İnsanlar üçün
potensial risk məlum deyil. Üçüncü trimestrdə istifadə yenidoğulmuşlarda və ya erkən doğulmuş
körpələrdə reaksiya ilə nəticələnə bilər. Həkim tərəfindən zəruri hesab edilmədiyi müddətcə hamiləlikdə
istifadə olunmamalıdır.
Psevdoefedrin:
Hamilə qadınlarda psevdoefedrinin istifadəsi ilə bağlı məlumatlar məhduddur. Hamiləliyin birinci
trimestrində psevdoefedrin istifadəsi anadangəlmə inkişaf qüsurları ilə müşayiət edilmişdir.
Psevdoefedrin damardaraldıcı xüsusiyyətlərinə görə uşaqlıq-cift qan dövranını pisləşdirə bilər.
Psevdoefedrin hamiləlikdə istifadə olunmamalıdır.
Laktasiya:
Parasetamol ana südü ilə ifraz olunur, lakin klinik əhəmiyyət kəsb edən miqdarda ifraz olunmur. Mövcud
və ya dərc edilmiş məlumatlarda laktasiya əks-göstəriş olaraq qeyd edilməyib.
Psevdoefedrin ana südündə cüzi miqdarda aşkar olunur. Südəmər körpələrdə qıcıqlanma və yuxunun
pozulması qeyd edilmişdir. Psevdoefedrin laktasiyanı azalda bilər.
Xlorfeniramin maleat və digər antihistaminlər laktasiyanı azalda bilər və ana südü ilə ifraz oluna bilər.
Həkim tərəfindən zəruri hesab edilmədiyi müddətcə laktasiya dövründə istifadə olunmamalıdır.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Taylol Hot D-nin tərkibindəki xlorfeniramin yuxululuğa, başgicəllənməyə, bulanıq görməyə və
psixomotor funksiyanın pozulmasına səbəb ola bilər ki, bu da nəqliyyat vasitələrini və digər
mexanizmləri idarə etmək qabiliyyətinə ciddi təsir göstərə bilər.
TAYLOL HOT D İstifadə qaydası və dozası
Taylol Hot D peroral yolla aşağıda göstərildiyi kimi istifadə edilir:
Hər bir paketin içində olan dərman preparatı təxminən 1 stəkan (160 ml) isti suda həll edilir və isti halda
qəbul olunur. Taylol Hot D hər 6 saatdan bir təkrar qəbul edilə bilər. Gündə 4 dəfədən artıq istifadə
edilməməlidir.
Əlavə təsirləri
Əlavə təsirlər rastgəlmə tezliyinə görə aşağıdakı kimi təsnif edilib:
çox tez-tez (≥1/10); tez-tez (≥1/100 - <1/10); bəzən (≥1/1,000 - <1/100); nadir (≥1/10,000 - <1/1,000);
çox nadir (<1/10,000), məlum deyil (əldə olan məlumatlara əsasən təyin oluna bilmir).
Parasetamol:
Parasetamolun mənfi təsirlərinə nadir hallarda rast gəlinir.
Qan və limfa sistemində pozulmalar: Nadir: qanda diskraziyalar, o cümlədən trombositopenik purpura,
methemoqlobinemiya və aqranulositoz (parasetamolla səbəb-nəticə əlaqəsi həmişə müəyyən
edilməmişdir).
Dəri və dərialtı toxumada pozulmalar: Çox nadir: dəridə ciddi reaksiyalar.
Xlorfeniramin:
Qan və limfa sistemində pozulmalar: Məlum deyil: hemolitik anemiya, qanda patoloji dəyişiklik.
İmmun sistemində pozulmalar: Məlum deyil: allergik reaksiya, angionevrotik ödem, anafilaktik
reaksiyalar.
Metabolizm və qidalanmada pozulmalar: Məlum deyil: anoreksiya.
Psixi pozulmalar: Məlum deyil: çaşqınlıq, həyəcan, qıcıqlanma, qarabasmalar, depressiya.
Sinir sistemində pozulmalar: Çox tez-tez: sedasiya, yuxululuq; Tez-tez: diqqət pozulması,
koordinasiyanın pozulması, başgicəllənmə, baş ağrısı.
Görmədə pozulmalar: Tez-tez: bulanıq görmə.
Eşitmə və müvazinətdə pozulmalar: Məlum deyil: tinnitus (qulaqlarda küy).
Ürək-damar sistemində pozulmalar: Məlum deyil: ürəkdöyünmə, taxikardiya, aritmiya, hipotenziya.
Tənəffüs sistemində pozulmalar: Məlum deyil: bronxial ifrazatların qatılaşması.
Mədə-bağırsaq sistemində pozulmalar: Tez-tez: ürəkbulanma, ağızda quruluq; Məlum deyil: qusma,
qarın ağrısı, ishal, dispepsiya.
Qaraciyər və öd yollarında pozulmalar: Məlum deyil: hepatit, sarılıq.
Dəri və dərialtı toxumada pozulmalar: Məlum deyil: eksfoliativ dermatit, səpgi, övrə, fotohəssaslıq.
Sümük-əzələ sistemində pozulmalar: Məlum deyil: əzələ qıcolması, əzələ zəifliyi.
Böyrəklərdə və sidikçıxarıcı yollarda pozulmalar: Məlum deyil: sidik ləngiməsi.
Ümumi pozulmalar: Tez-tez: yorğunluq; Məlum deyil: döş qəfəsində sıxılma.
Psevdoefedrin:
Ürək-damar sistemində pozulmalar: taxikardiya, ürəkdöyünmə, digər ürək aritmiyası, hipertenziya.
Mədə-bağırsaq sistemində pozulmalar: ürəkbulanma, qusma, ağızda quruluq; Məlum deyil: işemik kolit.
Sinir sistemində pozulmalar: baş ağrısı, titrəmə, təşviş, narahatlıq, yuxusuzluq, hallüsinasiyalar (xüsusən
uşaqlarda) və paranoid sayıqlamalar.
Görmədə pozulmalar: Məlum deyil: İşemik optik neyropatiya.
Böyrəklərdə və sidikçıxarıcı yollarda pozulmalar: sidik ləngiməsi (kişilərdə).
Dəri və dərialtı toxumada pozulmalar: dəridə reaksiyalar, o cümlədən səpgi; Məlum deyil: dəridə ağır
reaksiyalar, o cümlədən kəskin generalizə olunmuş ekzentematoz pustulyoz (KGEP).
GÖZLƏNİLMƏYƏN REAKSİYA YARANDIQDA HƏKİMƏ MÜRACİƏT EDİN!
Doza həddinin aşılması
Parasetamol:
10 q və ya daha çox parasetamol qəbul edən böyüklərdə qaraciyər zədələnə bilər.
Pasiyentdə risk amilləri varsa, 5 q və ya daha çox parasetamol qəbulu qaraciyərin zədələnməsinə səbəb
ola bilər. Risk amillərinə aiddir: karbamazepin, fenobarbital, fenitoin, primidon, rifampisin, adi dazıotu
və ya qaraciyər fermentlərini induksiya edən digər dərman vasitələri ilə uzun müddət müalicə; mütəmadi
olaraq tövsiyə olunandan artıq miqdarda etil spirtindən istifadə; qida qəbulunda pozulmalar, sistik fibroz,
İİV infeksiyası, acqalma, kaxeksiya halları.
Simptomları: Parasetamolun doza həddinin aşılmasının simptomları ilk 24 saat ərzində solğunluq,
ürəkbulanma, qusma, anoreksiya və qarın ağrısıdır. Qaraciyər zədələnməsi 12-48 saat ərzində təzahür edə
bilər. Qlükozanın metabolizmində pozulmalar və metabolik asidoz baş verə bilər. Ağır zəhərlənmə
olduqda qaraciyər çatışmazlığı ensefaloptaiya, qanaxma, hipoqlikemiya, serebral ödem və ölümlə
nəticələnə bilər. Hətta ağır qaraciyər çatışmazlığı olmadıqda kəskin tubulyar nekrozla kəskin böyrək
çatışmazlığı inkişaf edə bilər (bel ağrısı, hematuriya və proteinuriyanın olmasına əsasən ehtimal edilir).
Ürək aritmiyası və pankreatit qeydə alınmışdır.
Müalicəsi: Parasetamolun doza həddinin aşılması hallarının idarə olunmasında təcili müalicə zəruridir.
Mühüm erkən simptomlar olmasa belə, pasiyentlər təcili tibbi müdaxilə üçün xəstəxanaya
yönləndirilməlidir. Simptomlar ürəkbulanma və qusma ilə məhdudlaşa və doza həddinin aşılmasının
ağırlıq dərəcəsini və ya orqan zədələnməsi riskini əks etdirməyə bilər. Doza həddi 1 saat ərzində aşıldıqda
aktivləşdirilmiş kömürlə müalicə nəzərdə tutulmalıdır. Qəbuldan 4 saat sonra və ya daha gec qan
plazmasında parasetamol konsentrasiyası ölçülməlidir (erkən konsentrasiyalar etibarlı deyil). Parasetamol
qəbulundan sonra 24 saatadək N-asetilsisteinlə müalicə tətbiq edilə bilər, lakin maksimal qoruyucu təsir
qəbuldan sonra 8 saatadək əldə edilir. Lazım olduqda N-asetilsistein müəyyən edilmiş dozalanma
rejiminə uyğun olaraq pasiyentə venadaxili yeridilə bilər. Qusmaq problem törətmirsə, xəstəxanadan
kənarda oral metionin istifadəsi uyğun alternativ ola bilər. Qəbuldan 24 saat keçdikdən sonra ciddi
qaraciyər disfunksiyası təzahür edən xəstələrin müalicəsi xəstəxananın müvafiq ixtisaslaşmış şöbələrində
xüsusi tibbi nəzarət altında həyata keçirilməlidir.
Xlorfeniramin:
Simptomları: sedasiya, mərkəzi sinir sistemində paradoksal həyəcan, toksik psixoz, tənəffüsün
dayanması, qıcolmalar, antixolinergik təsir, distonik reaksiyalar və ürək-damar çatışmazlığı, o cümlədən
aritmiya.
Müalicəsi: Simptomatik və dəstəkləyici tədbirlər zamanı ürək, tənəffüs sistemi, böyrək və qaraciyərin
funksiyasına, həmçinin maye-elektrolit balansına xüsusi diqqət yetirilməlidir. Doza həddinin aşılması
peroral yolla baş verdikdə aktivləşdirilmiş kömürlə müalicə nəzərdə tutulmalıdır; bu zaman istifadə üçün
heç bir əks göstəriş olmamalı və doza həddi təzəlikcə aşılmalıdır (müalicə ən çox qəbuldan bir saat sonra
effektiv olur). Hipotenziya və aritmiya ciddi müalicə olunmalıdır; qıcolmalar venadaxili diazepamla
müalicə oluna bilər. Ağır hallarda hemoperfuziyadan istifadə edilə bilər.
Psevdoefedrin:
Simptomları: Doza həddinin aşılması simptomlarına qıcıqlanma, narahatlıq, ürək döyüntüsünün
tezləşməsi, hipertenziya, sidik ifrazında çətinlik, ürəkbulanma, qusma, susuzluq və qıcolmalar daxildir.
Müalicəsi: Ağır doza həddinin aşılması zamanı mədənin yuyulması və aspirasiya həyata keçirilə bilər.
Simptomatik və dəstəkləyici tədbirlər xüsusən ürək-damar və tənəffüs sistemləri ilə bağlı həyata
keçirilməlidir. Qıcolmalara venadaxili diazepamla nəzarət olunmalıdır. Nəzərəçarpan dərəcədə həyəcan
və hallüsinasiyalara nəzarət etmək üçün xlorpromazindən istifadə oluna bilər. Ağır hipertenziyanı
fentolamin kimi alfa-adrenoblokator ilə müalicə etmək lazım gələ bilər. Ürək aritmiyasına nəzarət etmək
üçün beta-blokator lazım ola bilər.
Buraxılış forması
Birdəfəlik istifadə üçün daxilə qəbul edilən məhlulun hazırlanması üçün toz.
6 q toz, paketlərdə. 6 və ya 12 paket içlik vərəqə ilə birgə karton qutuya qablaşdırılır.
Aptekdən buraxılma şərti
Reseptsiz buraxılır.