Pharmed
SORBIFER DURULES 320/60MG N30 TB
TƏSDİQ EDİLMİŞDİR
Azərbaycan Respublikası
Səhiyyə Nazirliyi
Farmakoloji və Farmakopeya
Ekspert Şurasının sədri
_____________ E.M.Ağayev
_______________________ 2023-cü il
Dərman vasitəsinin istifadəsi üzrə təlimat (xəstələr üçün)
SORBİFER® DURULES® örtüklü tabletlər
SORBIFER® DURULES®
Beynəlxalq patentləşdirilməmiş adı: Ascorbic acid + Ferrous sulfate
Tərkibi
Təsiredici maddələr: 1 tabletin tərkibində 320 mq dəmir (III) sulfat (100 mq Fe (II) müvafiq), 60
mq askorbin turşusu vardır.
Köməkçi maddələr: povidon, polietilen tozu, karbomer 934 P, maqnezium stearat.
Örtük: hipromelloza, bərk parafin, makroqol 6000, titan dioksid, sarı dəmir oksidi.
Təsviri
Mərciyəbənzər, azacıq hər iki tərəfi qabarıq, bir tərəfində "Z" yazısı olan, xarakterik qoxulu, oxra-
sarı rəngli örtüklü tabletlərdir.
Farmakoterapevtik qrupu
Antianemik preparatlar; dəmir preparatları; daxilə qəbul üçün dəmir (ikivalentli) preparatları.
ATC kodu: B03AA07.
Farmakoloji xüsusiyyətləri
Farmakodinamikası
Orqanizmdə dəmirin rolu:
Dəmir (II) hemoqlobinin protoporfirin prostetik qrupunun komponenti kimi oksigenin və karbon
qazının birləşməsində və nəql olunmasında əhəmiyyətli rol oynayır.
Sitoxrom sisteminin protoporfirin qrupuna daxil olan dəmir elektronlarının nəql olunması
prosesində mühüm rol oynayır. Həmin proseslərdə elektronların tutulması və sərbəst buraxılması
Fe(II) ↔ Fe(III) geri dönən keçid reaksiyası nəticəsində mümkündür.
Bundan əlavə, əzələlərin mioqlobin zülalının tərkibində dəmirin əhəmiyyətli miqdarları mövcuddur.
Askorbin turşusu dəmirin sorulmasına və mənimsənilməsinə səbəb olur (askorbin turşusu Fe(II)
ionlarını stabilləşdirir və onların Fe(III) ionlarına çevrilməsinin qarşısını alır).
Təsir mexanizmi:
Dəmir Fe(II) ionlarının təsiredici maddəsindən tədricən azad olması, tabletlərin hazırlanma
texnologiyasının nəticəsidir. MBT-dən (mədə-bağırsaq traktından) keçdikdə, dəmir Fe(II) ionları 6
saat müddətində tabletlərin məsaməli matriksindən daimi azad olur. Təsiredici maddənin tədricən
azad olması dəmirin patoloji yüksək yerli konsentrasiyalarının inkişaf etməsinin qarşısını alır və
beləliklə, Sorbifer® Durules® preparatının istifadəsi selikli qişanın irritasiyasından (şiddətli
qıcıqlanmasından) qaçınmaq imkanı verir.
Farmakokinetikası:
Dəmir onikibarmaq bağırsaqdan və qalça bağırsağın yuxarı seqmentindən sorulur. Genomla
birləşmiş dəmirin sorulma dərəcəsi təxminən 20 %, genomla birləşməmiş dəmirin sorulma dərəcəsi
isə 10 % təşkil edir. Effektiv sorulma üçün dəmir Fe(II) ionları şəklində olmalıdır.
Daxilə qəbul edildikdən sonra, askorbin turşusu MBT-dən tamamilə sorulur. Mədənin
hidrogenxlorid turşusu və C vitamini dəmiri Fe(III) ionlarından Fe(II) ionlarına qədər reduksiya
edərək, dəmirin sorulmasını stimullaşdırır. Askorbin turşusu dəmirin sorulmasını yaxşılaşdırır və
eyni zamanda dərman preparatının biomənimsənilməsini də yaxşılaşdırır.
Bağırsağın epitelial hüceyrələrinə daxil olan dəmir Fe(II) ionları (ferro forma), gələcəkdə
apoferritinlə birləşən Fe(III) ionlarına (ferri formaya) qədər hüceyrədaxili oksidləşməyə məruz
qalır. Apoferritinin müəyyən bir hissəsi qana daxil olur, digər hissəsi isə bağırsağın epitelial
hüceyrələrində ferritin formasında saxlanılır ki, bu da qan dövranına 1-2 gündən sonra daxil olur və
ya epitelial hüceyrələrin deskvamasiyası (qabıqlanaraq təmizlənməsi) prosesində orqanizmdən
nəcislə birlikdə xaric olunur.
Qan dövranına daxil olan dəmirin təxminən 1/3-i apoferritinlə birləşir və bu zaman həmin
apoferritin molekulu transferrinə çevrilir. Dəmir-transferrin kompleksi hədəf-orqanlara nəql olunur
və onların səthində yerləşən hüceyrələrin reseptorları ilə birləşdikdən sonra endositoz vasitəsi ilə
sitoplazmaya daxil olur. Sitoplazmada dəmir transferrindən dissosiasiya olunur və yenidən
apoferritinlə birləşir. Apoferritin dəmirin Fe(III) ionlarına qədər oksidləşməsinə səbəb olur, dəmirin
reduksiyasında isə flavoproteinlər iştirak edir.
Qaraciyər və ya böyrək funksiyalarının pozğunluqları zamanı preparatın farmakokinetikası barədə
heç bir məlumat yoxdur.
Təhlükəsizliyin öyrənilməsi istiqamətində aparılan preklinik tədqiqatlar
Preparatın hər hansı bir təhlükəli xüsusiyyəti barədə heç bir məlumat yoxdur.
İstifadəsinə göstərişlər
Dəmirdefisitli anemiyanın profilaktikası və müalicəsi.
Hamilə qadınlarda qidalanma rasionu dəmirin adekvat qəbulunu təmin etmədikdə, dəmir defisitinin
profilaktikası.
Əks göstərişlər
- Preparatın tərkibinə daxil olan təsiredici maddələrdən və ya köməkçi maddələrdən hər hansı birinə
qarşı yüksək həssaslıq (“Tərkibi” bölməsinə bax);
- qida borusunun stenozu və/və ya mədə-bağırsaq traktının obstruktiv dəyişiklikləri;
- orqanizmdə dəmirin toplanmasının yüksəlməsi ilə müşayiət olunan patoloji proseslər (məsələn,
hemoxromatoz və hemosideroz);
- qan köçürülmələrinin təkrar aparılması;
- dəmir çatışmazlığı ilə əlaqəli olmayan digər anemiya növləri – həmin anemiyalar zamanı dəmir
çatışmazlığı müşahidə olunduğu hallar istisna olmaqla.
Xüsusi göstərişlər və ehtiyat tədbirləri
Preparat, yalnız dəmir çatışmazlığı ilə müşayiət olunan xəstəliklər zamanı effektivdir.
Müalicəyə başlamazdan əvvəl dəmir çatışmazlığı diaqnozu təsdiq edilməlidir (qan zərdabında
dəmirin aşağı səviyyəsi, dəmir birləşməsinin ümumi ehtiyatının yüksəlməsi). Dəmir çatışmazlığı ilə
əlaqəli olmayan digər anemiya növlərində (infeksiya nəticəsində inkişaf edən anemiya, xroniki
xəstəlikləri müşayiət edən anemiyalar, talassemiya) preparatın təyin edilməsi məqsədə uyğun
deyildir.Dəmir tərkibli peroral preparatların istifadəsi ilə müalicə müddətində MBT-də iltihabi və ya
xora xəstəliklərinin pisləşməsi müşahidə oluna bilər. Ağız boşluğunda xoraların əmələ gəlməsi və
dişlərin rənglənməsi riskinin mövcudluğunu nəzərə alaraq, tabletləri qırmaq, sormaq, ağız
boşluğunda saxlamaq və ya çeynəmək olmaz. Tabletlər daxilə bütöv və su ilə birlikdə qəbul
edilməlidir.Dəmir sulfat tərkibli preparatların təsadüfən tənəffüs yollarına daxil olması bronxların selikli
qişasının nekrozuna gətirib çıxara bilər ki, bu da öskürəyin meydana çıxmasına, qanlı bəlğəmin
ifraz olunmasına, bronxial stenoza və/və ya ağciyər infeksiyasının inkişaf etməsinə (aspirasiya
simptomlarının meydana çıxmasından bir neçə gün və ya bir neçə ay əvvəl baş verdiyi halda) səbəb
ola bilər. Yaşlı pasiyentlərə və udma qabiliyyətinin pozğunluqları qeyd olunan pasiyentlərə dəmir
sulfat tərkibli preparatlar yalnız, aspirasiyanın inkişaf etmə riski fərdi qaydada qiymətləndirildikdən
sonra təyin edilə bilər. Preparatın digər dərman formalarının istifadəsinin mümkünlüyü nəzərdən
keçirilə bilər. Bu səbəbdən, aspirasiya ehtimal edildiyi təqdirdə, dərhal tibbi yardıma müraciət
etmək lazımdır.
Dəmir preparatlarının istifadəsi, nəcisin qara rəngə boyanmasına səbəb ola bilər.
Digər dərman vasitələri ilə qarşılıqlı təsiri
Sorbifer® Durules® preparatının və aşağıda göstərilən dərman preparatlarının eyni zamanda
istifadəsindən çəkinmək lazımdır
Siprofloksasin: eyni zamanda istifadə edildikdə, siprofloksasinin sorulması 50 % aşağı düşür və
beləliklə, qan plazmasında siprofloksasinin konsentrasiyasının terapevtik səviyyəyə çatmaması
təhlükəsi mövcuddur.
Levofloksasin: eyni zamanda istifadə edildikdə, levofloksasinin sorulması zəifləyir.
Moksifloksasin: eyni zamanda istifadə edildikdə, moksifloksasinin biomənimsənilməsi 40 % azalır.
Moksifloksasini və Sorbifer® Durules® preparatı tabletlərini eyni zamanda istifadə etdikdə,
göstərilən preparatların istifadəsi arasında ən azı 6 saat təşkil edən maksimal mümkün zaman
intervalı gözlənilməlidir.
Norfloksasin: eyni zamanda istifadə edildikdə, norfloksasinin sorulması təxminən 75 % aşağı düşür.
Ofloksasin: eyni zamanda istifadə edildikdə, ofloksasinin sorulması təxminən 30 % aşağı düşür.
Mofetil mikofenolat: eyni zamanda istifadə edildikdə, mofetil mikofenolatın sorulması təxminən
90% aşağı düşür.
Sorbifer® Durules® preparatının və aşağıda göstərilən dərman preparatlarının eyni zamanda
istifadəsi müddətində onların dozalarının dəyişdirilməsi tələb oluna bilər
Aşağıda göstərilən preparatları və Sorbifer® Durules® preparatını eyni zamanda istifadə etdikdə,
göstərilən preparatların istifadəsi arasında ən azı 2-3 saat təşkil edən maksimal mümkün zaman
intervalı gözlənilməlidir.
Kalsium və ya maqnezium karbonat tərkibli qida əlavələri və eləcə də, alüminium hidroksid və
kalsium və ya maqnezium karbonat tərkibli antasid preparatlar dəmir duzları ilə komplekslər əmələ
gətirir və beləliklə, bir-birinin sorulmasının qarşılıqlı pisləşməsinə səbəb olur.
Kaptopril: kaptopril ilə eyni zamanda istifadə edildikdə, ehtimal ki, mədə-bağırsaq traktında
kimyəvi reaksiya nəticəsində preparatın konsentrasiya-zaman əyrisi altındakı sahə göstəricisi orta
hesabla 37 % aşağı düşür.
Sink: eyni zamanda istifadə edildikdə, sink duzlarının sorulması zəifləyir.
Klodronat, rizedronat, alendronat: in vitro şəraitdə aparılan tədqiqatlarda müəyyən edilmişdir ki,
dəmir tərkibli preparatlar klodronat, rizedronat və alendronat ilə komplekslərin əmələ gəlməsinə
səbəb olur. İn vivo tədqiqatların aparılmamasına baxmayaraq, ehtimal etmək olar ki, eyni zamanda
istifadə edildikdə, klodronatın, rizedronatın və alendronatın sorulması aşağı düşə bilər.
Deferoksamin: eyni zamanda istifadəsi müddətində komplekslərin əmələ gəlməsi nəticəsində həm
deferoksaminin, həm də dəmirin sorulması zəifləyir.
Levodopa və karbidopa: dəmir sulfatın levodopa və karbidopa ilə eyni zamanda istifadəsi
müddətində, ehtimal ki, xelat komplekslərin əmələ gəlməsi nəticəsində levodopanın bəzi
dozalarının biomənimsənilməsi 50 %, karbidopanın bəzi dozalarının biomənimsənilməsi isə 75 %
aşağı düşür.
Metildopa: dəmir duzlarının (dəmir sulfatın və qlükonatın) metildopa ilə eyni zamanda istifadəsi
müddətində, ehtimal ki, xelat komplekslərin əmələ gəlməsi nəticəsində metildopanın
biomənimsənilməsi aşağı düşür ki, bu da onun antihipertenziv effektinin pisləşməsinə səbəb ola
bilər.
Penisillamin: dəmir duzlarının və penisillaminin eyni zamanda istifadəsi müddətində, ehtimal ki,
xelat komplekslərin əmələ gəlməsi nəticəsində həm penisillaminin, həm də dəmir duzlarının
sorulması zəifləyir.
Tetrasiklin: eyni zamanda istifadə edildikdə, həm tetrasiklinin, həm də dəmir tərkibli preparatların
sorulması zəifləyir və bu səbəbdən, göstərilən preparatların kombinasiya şəklində istifadəsi arasında
ən azı 3 saat təşkil edən maksimal mümkün zaman intervalı gözlənilməlidir.
Dəmir tərkibli preparatların həm daxilə, həm də vena daxilinə istifadəsi, doksisiklinin enterohepatik
siklinin pisləşməsinə səbəb olur.
Qalxanabənzər vəzinin hormonları: dəmir tərkibli preparatların və tiroksinin eyni zamanda
istifadəsi müddətində tiroksinin sorulması zəifləyə bilər ki, bu da əvəzedici müalicənin müvəffəqiyyətsizliyinə gətirib çıxara bilər.
Simetidin: Sorbifer® Durules® preparatı tabletlərini simetidinlə eyni zamanda istifadə etdikdə,
simetidinin təsiri nəticəsində mədə turşuluğunun aşağı düşməsi dəmirin sorulmasının zəifləməsinə
gətirib çıxarır və bu səbəbdən, göstərilən 2 preparatın istifadəsi arasında 2 saatlıq zaman intervalı
gözlənilməlidir.
Xloramfenikol: preparatın xloramfenikolla eyni zamanda istifadəsi, dəmirlə əvəzedici müalicənin
klinik effektinin inkişaf etməsinin ləngiməsinə səbəb ola bilər.
Sorbifer® Durules® preparatını çay, kofe, yumurta, süd məhsulları, iri üyüdülmüş (kəpəkli) undan
hazırlanmış çörək, taxıl lopaları və ya liflərlə zəngin qida ilə birlikdə istifadə etdikdə, dəmirin
sorulması zəifləyə bilər.
Askorbin turşusu ilə əlaqəli qarşılıqlı təsirləri
Askorbin turşusu qanda salisilatların (kristaluriyanın inkişaf etmə riski yüksəlir), etinilestradiolun,
benzilpenisillinin və tetrasiklinlərin konsentrasiyasının yüksəlməsinə səbəb olur. Peroral
kontraseptivlərin konsentrasiyasını aşağı salır. Noradrenalinin aktivliyini yüksəldir.
Kumarin və heparin törəmələrinin antikoaqulyant effektini zəiflədir. Bağırsaqda dəmir
preparatlarının və eləcə də, qida məhsullarının tərkibinə daxil olan dəmirin (üçvalentli dəmirin
ikivalentli dəmirə çevrilməsi hesabına) sorulmasını yaxşılaşdırır. Etil spirtinin ümumi klirensinin
yüksəlməsinə səbəb olur. Xroniki alkoqolizmin müalicəsi müddətində disulfiramın effektivliyinə
təsir göstərə bilər. Askorbin turşusunun və deferoksaminin eyni zamanda istifadəsi dəmirin
xaricolmasını gücləndirir.
Asetilsalisil turşusu, peroral kontraseptivlər, təzə meyvə şirələri və qələvi içkilər askorbin
turşusunun sorulmasını və mənimsənilməsini aşağı salır.
Uyuşmazlığı
İstifadə edilmir.
Hamiləlik və laktasiya dövründə istifadəsi
Sorbifer® Durules® terapevtik dozada hamiləlik və laktasiya dövründə istifadə edilə bilər.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Sorbifer® Durules® avtomobil və mexanizmləri idarə etmək qabiliyyətinə təsir etmir, belə məlumat
yoxdur.
İstifadə qaydası və dozası
Dozalanma rejimi
Böyüklərə və yaşı 12-dən yuxarı olan uşaqlara
Preparatın adətən tövsiyə edilən dozası gündə 2 dəfə (səhər və axşam) 1 tablet təşkil edir. Əlavə
effektlər meydana çıxdığı halda, preparatın dozası adətən tövsiyə edilən dozanın yarısına qədər
(sutkada 1 tabletə qədər) azaldıla bilər.
Dəmir çatışmazlığı qeyd olunan pasiyentlərdə, zərurət yarandığı halda, dozanın gündə 2 dəfə (səhər
və axşam) 3-4 tabletə qədər artırılması mümkündür.
Hamiləlik dövründə istifadəsi
Hamilə qadınlar üçün preparatın tövsiyə edilən dozası – hamiləlik dövrünün ilk 6 ayı müddətində
gündə 1 dəfə 1 tablet və hamiləlik dövrünün üçüncü trimestri müddətində və laktasiya dövründə
gündə 2 dəfə 1 tablet təşkil edir.
Müalicənin davametmə müddəti dəmir mübadiləsinin vəziyyətini xarakterizə edən laborator
göstəricilərə əsasən, fərdi qaydada müəyyən edilir. Müalicə, orqanizmdə hemoqlobinin optimal
səviyyəsi əldə edilənə və dəmir ehtiyatları bərpa olunana qədər (təxminən 2 ay) davam
etdirilməlidir. Dəmir depolarının davamlı artırılması üçün preparatın istifadəsinin təxminən 2 ay
müddətində davam etdirilməsi tələb oluna bilər. Dəmirin əhəmiyyətli çatışmazlığı zamanı
müalicənin davam etmə müddəti adətən 3-6 ay təşkil edir.
Uşaqlar və 18 yaşa qədər yeniyetmələr
Südəmər körpələrə və yaşı 12-dən aşağı olan uşaqlara tabletləri təyin etmək olmaz.
İstifadə qaydası
Preparat daxilə istifadə üçün nəzərdə tutulmuşdur.
Tabletləri sormaq, ağız boşluğunda saxlamaq, qırmaq və ya çeynəmək olmaz. Tabletlər daxilə bütöv və su ilə birlikdə qəbul edilməlidir. Tabletlər, fərdi tolerantlıqdan asılı olaraq, qida
qəbulundan əvvəl və ya qida qəbulu zamanı istifadə edilməlidir.
Tabletləri uzanılı vəziyyətdə qəbul etmək olmaz.
Əlavə təsirləri
Sorbifer® Durules® preparatının istifadəsi ilə müalicə müddətində aşağıda göstərilən əlavə
effektlərin meydana çıxması barədə məlumatlar daxil olmuşdur ki, bunlar da orqan sistemlərinə və
meydana çıxma tezliyinə əsasən təsnif edilmişdir. Əlavə effektlərin tezlik parametrləri aşağıda
göstərildiyi kimi müəyyən edilmişdir: tez-tez (≥ 1/100-< 1/10), nadir hallarda (≥ 1/10000-<
1/1000), məlum deyil (əldə olunan məlumatlar əsasında tezliyin qiymətləndirilməsi mümkün deyil).
İmmun sistemdə baş verən pozğunluqlar: məlum deyil – hiperhəssaslıq reaksiyaları (səpgilər,
anafilaktik reaksiyalar, angionevrotik ödem).
Mədə-bağırsaq traktında baş verən pozğunluqlar: tez-tez – ürəkbulanma, qarın nahiyəsində ağrı,
diareya, qəbizlik; nadir hallarda – qida borusunun xoralı zədələnməsi, qida borusunun stenozu.
Qeydiyyatdan sonrakı dövr
Qeydiyyatdan sonrakı dövrdə aşağıda göstərilən əlavə reaksiyaların meydana çıxması barədə
məlumatlar daxil olmuşdur. Həmin reaksiyaların baş vermə tezliyi məlum deyildir (əldə olunan
məlumatlar əsasında tezliyin qiymətləndirilməsi mümkün deyil).
Tənəffüs sistemində, döş qəfəsi və divararası orqanlarda baş verən pozğunluqlar: bronxial stenoz
(“Xüsusi göstərişlər və ehtiyat tədbirləri” bölməsinə bax).
Mədə-bağırsaq traktında baş verən pozğunluqlar: ağız boşluğunda xoraların əmələ gəlməsi*,
qusma.
* Preparatın qeyri-düzgün istifadəsi ilə əlaqəli, məsələn, tabletləri çeynədikdə, sorduqda və ya ağız
boşluğunda uzun müddət ərzində saxladıqda meydana çıxmışdır.
Tabletlərin tənəffüs yollarına daxil olması nəticəsində yaşlı pasiyentlərdə və udma qabiliyyətinin
pozğunluqları qeyd olunan pasiyentlərdə qida borusunun zədələnməsi və ya bronxial nekrozun
inkişaf etməsi riski yüksəlir.
Əlavə effektlər barədə məlumatlar
Əlavə effektlər, o cümlədən, bu içlik vərəqədə qeyd olunmayan istənilən əlavə effektlər meydana
çıxdığı halda, həkimə və ya əczaçıya müraciət etmək lazımdır.
Dərman preparatının qeydiyyatından sonrakı dövründə ehtimal edilən bütün əlavə effektlər barədə
istənilən məlumatın mühüm əhəmiyyəti vardır, çünki həmin məlumatlar preparatın təhlükəsizliyini
fasiləsiz izləmək imkanı verir. Səhiyyə işçiləri istənilən əlavə reaksiyaların meydana çıxması barədə
Milli farmakonəzarət sisteminə müvafiq məlumat verməlidirlər.
Doza həddinin aşılması
Dəmirin hətta nisbətən yüksək olmayan səviyyələri intoksikasiya simptomlarının meydana
çıxmasına səbəb ola bilər. Göstərilmişdir ki, dəmirin hətta 20 mq/kq-a ekvivalent miqdarı bəzi
intoksikasiya simptomlarının inkişaf etməsinə gətirib çıxara bilər; dəmirin miqdarı 60 mq/kq-dan
yüksək olduğu halda isə həmin simptomların inkişaf etməsi gözləniləndir. Dəmirin 200-250 mq/kq-
a ekvivalent miqdarlarının istifadəsi ölümlə nəticələnə bilər.
Simptomları
Qan zərdabında dəmir səviyyələrinin müəyyən edilməsi, zəhərlənmənin ağırlıq dərəcəsinin
qiymətləndirilməsi zamanı yardım edə bilər. Dəmir səviyyələrinin simptomlarla hər zaman yaxşı
korrelyasiya etməməsinə baxmayaraq, preparatın daxilə istifadəsindən 4 saat sonra dəmirin
müəyyən edilən konsentrasiyaları zəhərlənmənin ağırlıq dərəcəsini aşağıda göstərildiyi kimi
nümayiş etdirir:
- 3 mkq/ml-dən aşağı – yüngül zəhərlənmə;
- 3-5 mkq/ml – mülayim zəhərlənmə;
- > 5 mkq/ml – ağır zəhərlənmə.
Dəmirin maksimal konsentrasiyaları, dəmirin daxilə istifadəsindən 4-6 saat sonra müəyyən edilir.
Yüngül-mülayim zəhərlənmə: qusma və diareya – preparatın daxilə istifadəsindən sonra 6 saat
müddətində inkişaf edə bilər.
Ağır zəhərlənmə: ağır dərəcəli qusma və diareya, letargiya, metabolik asidoz, şok, mədə-bağırsaq
traktından qanaxma, koma, qıcolmalar, hepatotoksiklik, nisbətən gec – MBT stenozu. Bundan
əlavə, ağır toksiklik qaraciyər nekrozunun və sarılığın, hipoqlikemiyanın, qanın laxtalanma
qabiliyyətinin pozulmasının, oliquriyanın, böyrək çatışmazlığının və ağciyər ödeminin inkişaf
etməsinə səbəb olur.
Dəmir duzlarının istifadəsi ilə əlaqəli doza həddinin aşılması erkən yaşlı uşaqlarda xüsusilə
təhlükəlidir.
C vitamininin istifadəsi nəticəsində meydana çıxan doza həddinin aşılması, ağır dərəcəli asidozun
və meylli pasiyentlərdə hemolitik anemiyanın (qlükoza-6-fosfatdehidrogenaza fermentinin
çatışmazlğı) meydana çıxmasına səbəb ola bilər.
Müalicəsi
1. Pasiyentə süd və qusma törədən maye verilməlidir (mümkün qədər tez).
2. Mədə, natrium bikarbonatın 5 %-li məhlulu və işlədici duzlar (məsələn, natrium sulfat, böyüklər
üçün 30 q dozada) vasitəsi ilə yuyulmalıdır; 5 q bismut karbonat ilə kombinasiya şəklində
yumşaldıcı vasitə kimi süd və yumurta təyin edilməlidir.
Mədə yuyulduqdan sonra 50-100 ml suda həll edilmiş 5 q deferoksamin təyin edilməlidir və həmin
məhlul mədədə saxlanılmalıdır. Bağırsaq aktivliyinin stimullaşdırılması məqsədi ilə yetkin yaşlı
pasiyentlərə daxilə mannit və ya sorbit məhlulu təyin edilə bilər.
Erkən yaşlı uşaqlarda diareyanın törədilməsinin təhlükəli ola bilməsini nəzərə alaraq, diareya
törətmək tövsiyə olunmur.
Aspirasiyanın qarşısını almaq məqsədi ilə pasiyentlərin vəziyyətlərinə hərtərəfli nəzarət edilməlidir.
3. Rentgenoqrammada tabletlərin kölgə şəklində izlənilməsini nəzərə alaraq, törədilən qusmadan
sonra mədədə qalan tabletləri qarın nahiyəsinin rentgenoqramması vasitəsi ilə aşkar etmək
mümkündür.
4. Vena daxilinə xelat birləşmələrin infuziyasının (uzunmüddətli infuziya şəklində natrium, kalsium
edetat, 500 mq/500 ml-də) təyin edilməsi məqsədə uyğundur. Dimerkaprolun dəmirlə birlikdə
toksik komplekslər formalaşdırdığını nəzərə alaraq, dimerkaproldan istifadə etmək olmaz.
Deferoksamin dəmirlə birlikdə xelat kompleks formalaşdıran spesifik preparatdır.
Uşaqlarda kəskin, ağır dərəcəli zəhərlənmə baş verdiyi halda, hər zaman deferoksamin əzələ
daxilinə 90 mq/kq və daha sonra vena daxilinə 15 mq/kq dozalarda, qan zərdabında dəmirin
səviyyəsi qan zərdabının dəmiri birləşdirmək qabiliyyətinə müvafiq olana qədər təyin edilməlidir.
İnfuziyanın yeridilmə sürəti həddindən artıq yüksək olduğu halda, hipotoniya inkişaf edə bilər.
5. Ağırlıq dərəcəsinə görə nisbətən yüngül intoksikasiya baş verdiyi halda, deferoksamin əzələ
daxilinə 50 mq/kq dozada, 4 q maksimal dozaya qədər təyin olunur.
6. Ağır dərəcəli intoksikasiya: şok və/və ya koma vəziyyətində və qan zərdabında dəmir səviyyələri
yüksəldiyi (> 90 mmol/l uşaqlarda və > 142 mmol/l böyüklərdə) halda, dərhal intensiv, dəstəkləyici
müalicəyə başlamaq lazımdır. Şok zamanı qan və ya plazma köçürülməlidir, tənəffüs çatışmazlığı
qeyd olunduqda, oksigen ilə müalicə təyin edilməlidir.
7. İntoksikasiya əlamətləri aradan qaldırıldıqdan sonra qan zərdabında dəmir səviyyələrinin
monitorinqinin həyata keçirilməsi tövsiyə olunur.
Buraxılış forması
50 və ya 30 tablet polietilen qapaqlı qəhvəyi rəngli şüşə flakonda. 1 flakon içlik vərəqə ilə birlikdə
karton qutuya qablaşdırılır.
Saxlanma şəraiti
25ºС temperaturdan yüksək olmayan və uşaqların əli çatmayan yerdə saxlamaq lazımdır.
İstifadəsi və utilizasiyası zamanı ehtiyat tədbirləri
Xüsusi tədbirlər yoxdur.
Preparatın istənilən miqdarda istifadə edilməyən miqdarı və ya tullantısı yerli tələblərə uyğun məhv
edilməlidir.
Yararlılıq müddəti
3 il.
Son yararlılıq müddəti qeyd edilən ayın son gününə şamil edilir.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Reseptsiz buraxılır.
İstehsalçı
“Egis əczaçılıq zavodu” QSC.
9900 Körmend, Matyaş kiray k., ev 65, Macarıstan.
AstraZeneka (İsveç) şirkətinin lisenziyası ilə buraxılır.
Qeydiyyat vəsiqəsinin sahibi
“Egis əczaçılıq zavodu” QSC.
1106 Budapeşt, Keresturi k., 30-38, Macarıstan.