Pharmed
SALIPRA 2,5/0,5MG N20 FLK
TƏSDİQ EDİLMİŞDİR
Azərbaycan Respublikası
Səhiyyə Nazirliyi
Farmakoloji və Farmakopeya
Ekspert Şurasının sədri
_____________ E.M.Ağayev
“_____”______________ 2021-ci il
Dərman vasitəsinin istifadəsi üzrə təlimat (xəstələr üçün)
Bu dərmanı istifadə etməyə başlamazdan əvvəl bu içlik vərəqəsini diqqətlə oxuyun, çünki
onda Sizin üçün əhəmiyyətli məlumatlar yer almışdır.
• Bu içlik vərəqəsini saxlayın. Daha sonra onu təkrar oxumağa ehtiyac duya bilərsiniz.
• Əgər əlavə suallarınız olarsa, həkiminizlə və ya əczaçınızla məsləhətləşin.
• Bu dərman şəxsən Sizə təyin edilmişdir, onu başqalarına verməyin.
• Bu dərmandan istifadə zamanı həkimə və ya xəstəxanaya getməli olsanız, həkiminizə bu
dərmandan istifadə etdiyinizi bildirin.
• Bu təlimatda yazılanlara dəqiq əməl edin, dərmanla bağlı sizə tövsiyə ediləndən yüksək və
ya aşağı doza istifadə etməyin.
SALİPRA inhalyasiya üçün təkdozalı məhlul
SALIPRA
Beynəlxalq patentləşdirilməmiş adı: Ipratropium bromide monohydrate + Salbutamol sulfat
Tərkibi
Təsiredici maddə: 2,5 ml-lik tək dozalı flakonda 0,5 mq ipratropium bromid
(0,52 mq ipratropium bromid monohidrat şəklində) və
2,5 mq salbutamol (3,01 mq salbutamol sulfat şəklində) vardır.
Köməkçi maddələr: natrium xlorid, 1N xlorid turşusu, inyeksiya üçün su.
Təsviri
Yaşılımtıl sarı rəngli, şəffaf, bircinsli məhluldur.
ATC kodu: R03AL02.
Farmakoloji xüsusiyyətləri
• SALİPRA inhalasiya üçün məhlul, ağız və ya burundan nəfəs yolu ilə (inhalasiya yolu ilə) istifadə
etmək üçün hazırlanmış məhluldur. Püskürdücü (Nebulayzer) cihazla istifadə edildikdə hava ilə
qarışaraq havada asılı zərrəciklər (aerozol) əmələ gətirir və ağciyərlərə bu şəkildə çatır.
SALİRPA inhalasiya məhlulu, hər biri birdəfəlik istifadə üçün hazırlanmış, 20 ədəd 2,5 ml-lik
məhluldan ibarət 5 ml-lik polietilen flakonlarda qablaşdırılmış şəkildə satışa təqdim edilir.
• SALİPRA-nın təsiredici maddələrindən biri olan ipratropium bromid xolinoblokatorlar adlanan
dərman qrupuna aiddir. Digər təsiredici maddə olan salbutamol isə β-adrenergiklər adı verilən
dərman qrupuna aiddir. Hər iki dərman qrupu da, bronxodilatatorlar (bronxgenişləndiricilər) adında,
daha geniş bir dərman sinfinin üzvüdür. Bronxodilatatorlar (bronxgenişləndiricilər) ağciyər
daxilindəki hava yollarını genişləndirərək havanın ciyərlərinizə girib çıxmasını asanlaşdıran və nəfəs
alıb vermənizi yüngülləşdirən dərmanlardır. İpratropium bromid və salbutamol, hava yollarını
genişləndirici təsirlərini fərqli mexanizmlər vasitəsilə göstərir. Bu iki maddənin birlikdə kombinasiya
şəklində istifadə edilməsi, hər bir maddənin tək olaraq istifadəsi nəticəsində əldə ediləndən daha çox
bronxgenişləndirici təsir əldə etməyə imkan verir.
İstifadəsinə göstərişlər
SALİPRA, ağciyərlərin xronik obstruktiv xəstəliyi (AXOX) olan və birdən çox bronxgenişləndirici
dərmana ehtiyacı olan insanların daha rahat nəfəs alıb vermələrinə kömək edir. AXOX, təngnəfəsliyə
və öskürəyə səbəb olan, uzun müddət davam edən ağciyər xəstəliyidir. AXOX termini, xronik
bronxit və emfizema xəstəlikləri ilə bağlı bir panel mənasında istifadə edilir.
SALİPRA, tənəffüs yolu ilə tətbiq edildiyi zaman ağciyərlərə seçici təsir göstərir. SALİPRA, nəfəs
yolu ilə qəbul edildikdən sonra bronxlarda olan genişlənmə, əsasən yerli (lokal) (tənəffüs yolları
üzərində) təsir olub, bütün orqanizmi əhatə edən ümumi (sistem) təsir deyildir.
Tək dozalıq ampullar müvafiq nebulayzer cihazı ilə inhalasiya formasında istifadə edilmək üçün
hazırlanmışdır. SALİPRA-nın düzgün şəkildə istifadəsi ilə bağlı “İstifadə qaydası və dozası”
bölməsinə və bu təlimatın sonunda olan istifadə qaydasına baxın.
Əks göstərişlər
Aşağıdakı hallarda preparatdan istifadə etmək olmaz, əgər;
• İpratropium bromidə, salbutamola və ya bu dərmanın tərkibindəki köməkçi maddələrdən hər hansı
birinə qarşı yüksək həssaslığınız (allergiyanız) varsa,
• Atropinə və ya törəmələrinə qarşı yüksək həssaslığınız (allergiyanız) varsa,
• Həkiminiz sizdə hipertrofik obstruktiv kardiomiopatiya olaraq adlandırılan ürək xəstəliyinin
olduğunu bildiribsə,
• Həkiminiz sizdə taxiaritmiya adlanan ürək xəstəliyinin olduğunu bildiribsə.
Xüsusi göstərişlər və ehtiyat tədbirləri
• SALİPRA-nın tətbiqindən sonra ani yüksək həssaslıq reaksiyaları yarana bilər; bu şəkildə nadir
hallarda övrə, ağız, dil və boğazda şişkinlik (angioödem), səpgilər və xırıltı ilə nəfəs alma hallarına
rast gəlinmişdir.
• Məhlulun ya da buxarının istənmədən gözə düşməsi nəticəsində göz bəbəyinin genişlənməsi, gözdə
ağrı və ya bulanıq görmə, gözdaxili təzyiqin yüksəlməsi baş verə bilər.
• Gözün qızarması ilə birlikdə gözdə ağrı və ya narahatlıq hissi, bulanıq görmə, halələr və ya rəngli
görüntülər görmə, ani inkişaf edən qlaukoma (gözdaxili təzyiqin artması/göz təzyiqi) əlamətləri ola
bilər. Bu əlamətlər hər hansı bir kombinasiya şəklində ortaya çıxarsa, dərhal bir mütəxəssis həkimin
fikri alınmalıdır.
• SALİPRA-dan düzgün şəkildə necə istifadə ediləcəyini həkiminiz ya da əczaçınızdan mütləq
öyrənin. Məhlulun ya da buxarının gözlərinizə təmas etməməsi üçün diqqətli olmalısınız. SALİPRA-
dan ağızlıq vasitəsilə istifadə etmək məsləhət görülür. Əgər ağızlıq yoxdursa və nebulayzerin
maskasından istifadə ediləcəksə, bu maskanın üzünüzə tam olaraq oturması lazımdır. Əgər gözdaxili
təzyiqiniz yüksəkdirsə (qlaukoma) və ya gözlərinizdə bu istiqamətdə bir meyillik (risk) varsa,
gözlərinizi qorumanız daha əhəmiyyətlidir.
• Kifayət qədər nəzarət altında olmayan şəkər xəstəliyiniz (diabet), yaxınlarda keçirilmiş ürək tutması
(miokard infarktı), kəskin ürək və ya damar xəstəlikləri, tiroid vəzinin hiperfunksiyası
(hipertiroidizm), böyrəküstü vəzlərdə xüsusi şiş (feoxromositoma), gözdaxili təzyiqdə yüksəklik
(qlaukoma) riski, prostatın böyüməsi ya da sidik kisəsi boynunda tıxanma kimi sidiyə getməni
çətinləşdirən hallar varsa, bunları həkiminizə bildirməlisiniz.
• Əgər kəskin ürək xəstəliyiniz varsa, dərmanının istifadəsi zamanı sinədə ağrı və ya digər
əlamətlərlə ağırlaşma hiss etsəniz həkiminizə müraciət edin.
• Nəfəs alıb vermənizi yüngülləşdirən başqa dərmanlar qəbul edirsinizsə, bunu həkiminizə bildirin.
Bu qrup dərmanlar qanınızdakı kaliumun miqdarının azalmasına səbəb ola bilər.
• Əgər kistoz fibroz adı verilən nadir irsi xəstəliyiniz varsa, mədə-bağırsaq problemlərinə daha
meyilli olma ehtimalınız var.
• Sürətlə pisləşən tənəffüs çətinliyi vəziyyətində dərhal həkiminizə müraciət edin.
• Xəstəliyinizin əlamətlərini aradan qaldırmaq üçün, daha yüksək SALİPRA dozalarına ehtiyac
duyursunuzsa, həkiminizə müraciət edin.
• SALİPRA, doğuş zamanı uşaqlığın yığılmasının qarşısını ala bilər. Əgər hamiləliyinizin son üç
ayındasınızsa, bu barədə həkiminizlə məsləhətləşin.
• Əgər idmançılara tətbiq olunan testlər əhatəsində, dopinq testi üçün sizdən sidik nümunəsi
istənilirsə, testi tətbiq edən şəxsə SALİPRA istifadə etdiyinizi bildirin, çünki dərmanın tərkibində
olan salbutamol bu testin müsbət nəticələnməsinə yol aça bilər.
• Əgər SALİPRA-nı qəbul etdikdən sonra xırıltı ilə nəfəs almağa başlasanız və ya başqa cür tənəffüs
çətinliyi yaranarsa (inhalasiya ilə bağlı bronxların spazmı), başqa doza almayın və dərhal həkiminizə
müraciət edin.
• SALİPRA ilə müalicə müddətinə həkiminiz qərar verəcək və bu müddət xəstəliyinizin gedişindən
asılı olacaq.
SALİPRA yalnız tənəffüs yolu ilə qəbul edilməlidir. Bu dərmanı içmək ya da inyeksiya yolu ilə
istifadə etmək olmaz.
Bu xəbərdarlıqlar, keçmişdəki hər hansı bir dövrdə belə olsa sizin üçün keçərlidirsə həkiminizlə
məsləhətləşin.
Digər dərman vasitələri ilə qarşılıqlı təsiri
Əgər birlikdə aşağıdakı dərmanlardan hər hansı birindən istifadə edirsinizsə, daha diqqətli olmalı və
bu dərmanları qəbul etdiyinizi həkiminizə bildirməlisiniz:
• Ksantin törəmələri (məs., teofillin), digər β-adrenomimetiklər (bunlar tənəffüs dərmanlarıdır) və
xolinoblokatorlar (bunlar batıcı xüsusiyyətdə sancı, parkinson xəstəliyi, tez-tez sidiyə getmə və
sidiyini saxlaya bilməmə kimi hallarda istifadə edilən dərmanlardır),
• Kortikosteroid qrupu dərmanları (kortizon; immunitetin zəifləməsi hallarında istifadə edilir),
• Sidikqovucu dərmanlar (diuretiklər).
• Diqoksin adlı ürək dərmanı,
• β-Blokatorlar (ürək-damar dərmanları),
• Ruh düşkünlüyünün (depressiya) müalicəsində istifadə edilən MAO inhibitorları və ya trisiklik
antidepressantlar,
• Bəzi anesteziyaedici qazlar. Bu dərmanlardan əməliyyat zamanı xəstənin keyləşdirilməsi üçün
istifadə edilir.
Əgər əməliyyat keçirəcəksinizsə, həkiminizə SALİPRA-dan istifadə etdiyinizi bildirin.
Əgər reseptlə və ya reseptsiz buraxılmasından asılı olmayaraq hər hansı bir dərmandan hal-hazırda
istifadə edirsinizsə və ya son zamanlarda istifadə etmisinizsə, həkiminizə və ya əczaçınıza bu barədə
məlumat verin.
Hamiləlik və laktasiya dövründə istifadəsi
Hamiləlik
Dərmandan istifadə etməzdən əvvəl həkiminizlə və ya əczaçınızla məsləhətləşin.
SALİPRA-dan hamiləlik zamanı yalnız, həkiminiz diqqətlə risk və fayda nisbətini
qiymətləndirdikdən sonra lazım görərsə, istifadə edə bilərsiniz.
Müalicə müddəti ərzində tibbi olaraq təsirli olduğu qəbul edilən doğuşa nəzarət üsulundan istifadə
edə bilərsiniz.
Müalicə zamanı hamilə olduğunuzu müəyyən etsəniz həkiminizlə və ya əczaçınızla məsləhətləşin.
Laktasiya
Dərmandan istifadə etməzdən əvvəl həkiminizlə və ya əczaçınızla məsləhətləşin.
Körpənizi əmizdirmə dövründə SALİPRA-dan yalnız, həkiminiz diqqətlə risk və fayda nisbətini
qiymətləndirdikdən sonra lazım görərsə, istifadə edə bilərsiniz.
SALİPRA ana südünə keçir; yenidoğulmuşlara təsiri aşkar edilməmişdir.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri barədə
araşdırma aparılmamışdır.
Ancaq SALİPRA ilə müalicə zamanı başgicəllənmə, gözün fərqli uzaqlıqlara zillənməsində
pozuqluq, göz bəbəyində böyümə və bulanıq görmə kimi xoşa gəlməyən təsirlər ortaya çıxa bilər.
Buna görə də avtomobili idarə edərkən ya da cihaz və ya maşından istifadə edərkən diqqətli olmanız
lazımdır. Əgər sizdə yuxarıda haqqında danışılan əlavə təsirlər yaranarsa, avtomobili idarə etmə ya
da cihaz və ya maşından istifadə etmə kimi potensial təhlükə daşıyan işlərdən uzaq durmalısınız.
İstifadə qaydası və dozası
Dərmandan nə zaman və necə istifadə edəcəyiniz ilə bağlı həkiminizin təlimatlarını izləyin və hər
vaxt üçün istifadə təlimatını (içlik vərəqəni) oxuyun.
Yeniyetmələr/Yaşlılar /, 12 yaşdan böyük uşaqlar
Ani ortaya çıxan (kəskin) xəstəliklərin müalicəsi
Əlamətlərdə sürətlə yaxşılaşma üçün əsasən 1 ədəd tək dozalıq flakon kifayətdir.
Şiddətli vəziyyətlərdə əgər xəstəlik 1 ədəd tək dozalıq flakon ilə keçmirsə, iki ədəd tək dozalıq
flakona ehtiyac ola bilər. Bu cür vəziyyətlərdə dərhal həkiminizə və ya ən yaxın xəstəxanaya
müraciət edin.
Müddətli müalicə
Gündə üç və ya dörd dəfə 1 ədəd tək dozalıq flakon.
İstifadə qaydası
SALİPRA inhalasiya məhlulu, uyğun bir nebulayzer (püskürdücü) və ya intermitan pozitiv təzyiqli
tənəffüs cihazı (ventilyator) ilə tətbiq oluna bilər. SALİPRA-nın doğru şəkildə istifadəsi üçün, bu
təlimatın sonundakı tətbiq qaydalarına baxın. Yenə də əmin olmasanız, həkiminizlə və ya əczaçınızla
məsləhətləşin.
Müxtəlif yaş qrupları
Uşaqlarda istifadəsi: Uşaqlarla bağlı məlumatların az olması səbəbiylə, SALİPRA-dan uşaqların
istifadə etməsi məsləhət görülmür.
Yaşlılarda istifadəsi
Yaşlı xəstələr SALİPRA-dan xüsusi dozanın müəyyən edilməsinə ehtiyac olmadan istifadə edə
bilərlər.
Xüsusi istifadə halları
Böyrək / qaraciyər çatmazlığı
SALİPRA-nın qaraciyər ya da böyrək çatışmazlığı olan xəstələr üzərində təsirləri araşdırılmadığı
üçün bu kimi xəstələr bu dərmandan diqqətlə istifadə etməlidirlər.
SALİPRA-nın qida və içki ilə istifadəsi
SALİPRA tənəffüs yolu ilə qəbul edildiyi üçün qida və içkilərin bu dərmana təsiri yoxdur.
SALİPRA-dan istifadə etməyi unutsanız
Əgər tövsiyə edilən SALİPRA dozalarından birini vaxtında qəbul etməyi yaddan çıxarsanız narahat
olmayın, xatırlayan kimi qəbul edin. Ancaq əgər bir sonrakı dozanın vaxtı yaxınlaşıbsa, gözləyin və
vaxtı gələn dozanı qəbul edin. Daha sonra dərmanınızı əvvəlki qayda ilə qəbul etməyə davam edin.
Yaddan çıxarılan dozaları əvəz etmək üçün ikiqat doza qəbul etməyin.
SALİPRA ilə müalicəni dayandırdıqda meydana çıxa biləcək təsirlər
SALİPRA ilə müalicənin vaxtındanəvvəl başa çatdırılması, xəstəliyinizin ağırlaşmasına yol aça bilər.
Bu səbəbdən, şikayətləriniz aradan qalxmış olsa belə, həkiminizin reseptlə müəyyən etdiyi müddət
ərzində SALİPRA-dan istifadə etməyə davam edin. Əgər bu müalicəni dayandırmaq istəyirsinizsə,
mütləq həkiminizlə məsləhətləşin.
Bu dərmanın istifadəsi ilə bağlı başqa suallarınız varsa, həkim və ya əczaçınızdan soruşun.
Əgər SALİPRA-nn təsirinin çox güclü və ya zəif olduğuna dair müşahidəniz varsa həkiminiz və ya
əczaçınız ilə danışın.
İstifadə üçün təlimat
Tək dozalıq flakonlardan ancaq uyğun nebulayzer cihazı vasitəsi ilə istifadə edin. Dərmanı içməyin
və ya damar daxilinə inyeksiya şəklində istifadə etməyin.
1. Nebulayzeri, istehsalçısının ya da həkiminizin təlimatlarına əsasən istifadəyə hazırlayın.
2. Tək dozalıq flakonu, uc hissəsini möhkəm şəkildə bükərək açın.
3. Tək dozalıq flakonun içindəkini nebulayzerin rezervuarına (anbar hissəsinə) boşaldın.
4. Nebulayzerin hissələrini birləşdirib, məsləhət görüldüyü formada nəfəs alın.
5. İstifadə etdikdən sonra rezervuarda qalan məhlulu atın və nebulayzeri istehsalçısının təlimatları
əsasında təmizləyin.
Tək dozalıq flakonların tərkibində qoruyucu maddə olmadığı üçün mikrobla keçməsinin qarşısını
almaq məqsədiylə, flakonun açıqlıqdan dərhal sonra istifadə edilməsi və hər tətbiqdə yeni bir
flakonun açılması vacibdir. Qismən istifadə edilmiş, açılmış və ya zədələnmiş tək dozalıq flakonlar
atılmalıdır.
SALİPRA püskürdülmə üçün içərisində tək dozalıq inhalasiya məhlulu olan flakonun, eyni
nebulayzer içində digər dərmanlarla qarışdırılmaması xüsusilə məsləhət görülür.
Əlavə təsirləri
Bütün dərmanlar kimi, SALİPRA-nın tərkibində olan maddələrə həssas olan şəxslərdə əlavə təsirlər
meydana çıxa bilər.
Aşağıdakılardan biri olarsa, SALİPRA-dan istifadə etməyi dayandırın və dərhal həkiminizə məlumat
verin və ya sizə ən yaxın xəstəxananın təcili yardım bölməsinə müraciət edin:
• Dəridə səpgilər, dildə, dodaqlarda və üzdə şişkinlik (angioödem), övrə, nəfəs borusunda tıxanma
kimi həddindən artıq həssaslıq reaksiyaları ortaya çıxa bilər.
Bunların hamısı çox ciddi əlavə təsirlərdir.
Əgər bu kimi təsirlər sizdə varsa, bu, sizin SALİPRA-ya qarşı ciddi allergiyanızın olması deməkdir.
Təcili tibbi müdaxiləyə və ya xəstəxanaya yatırılmanıza ehtiyac yarana bilər.
Bu çox ciddi əlavə təsirlərin hamısına nadir hallarda rast gəlinir.
Əgər aşağıda göstərilənlərdən hər hansı birini müəyyən etsəniz bunu dərhal həkiminizə bildirin və ya
sizə ən yaxın xəstəxananın təcili yardım bölməsinə müraciət edin:
Xırıltı ilə tənəffüs və ya nəfəs alıb verərkən başqa cür problemlərin mövcudluğu,
• Məhlulun ya da buxarının istənmədən gözə düşməsi nəticəsində gözdə ağrı və ya bulanıq görmə,
gözdaxili təzyiqin artması. Gözün qızarması ilə birlikdə gözdə ağrı və ya narahatlıq hissi, bulanıq
görmə, halələr və ya rəngli görüntülər görmə, ani inkişaf edən qlaukoma əlamətləri ola bilər. Bu
əlamətlər hər hansı bir kombinasiya şəklində ortaya çıxarsa, dərhal bir mütəxəssis həkimin fikri
alınmalıdır.
• Qan təzyiqində və ürək ritmində dəyişikliklər; ürəyin həddindən artıq sürətli və zəif döyünməsi,
ürək əzələsinə kifayət qədər qan getməməsi;
• Udlaqda şişkinlik (ödem), inhalasiyadan dərhal sonra bronxlarda spazm.
Bunların hamısı ciddi əlavə təsirlərdir. Təcili tibbi müdaxiləyə ehtiyac yarana bilər.
Ciddi əlavə təsirlərə nadir hallarda rast gəlinir.
Aşağıda göstərilənlərdən hər hansı birini müəyyən etsəniz, bunu həkiminizə bildirin:
SALİPRA ilə ayrıca aşağıdakı xoşa gəlməyən təsirlərə də rast gəlinmişdir.
Bəzən baş verən əlavə təsirlər (100 adamda 1-dən az, 1000 adamda 1-dən çox):
• Əsəbilik
• Başgicəllənmə, baş ağrısı, titrətmə
• Ürək çırpıntısı, nəbzin sürətlə vurması,
• Öskürək, səsdə pozuntular, boğazda qıcıqlanma
• Ağızda quruluq, ürəkbulanma
• Dəridə reaksiyalar
• Sistolik qan təzyiqində yüksəlmə
Nadir hallarda baş verən əlavə təsirlər (1000 adamda 1-dən az, 10000 adamda 1-dən çox):
• Qanda kaliumun səviyyəsinin azalması
• Zehni pozğunluq
• Gözlərin fərqli uzaqlıq ahəngində pozuqluq, gözün buynuz təbəqəsində maye toplanması (ödem),
gözün konyunktiv təbəqəsində qızartı, halələr görmə, göz bəbəklərinin böyüməsi, bulanıq görmə
• Bronxlarda spazm, boğazın quruması, qırtlaqda spazm
• Mədə-bağırsağın hərəki fəaliyyətində pozğunluq, ishal, qəbizlik, qusma, ağızda iltihab
• Həddindən çox tərləmə, övrə, qaşınma
• Əzələ spazmları, əzələlərdə zəiflik, əzələ ağrısı
• Sidiyəgetmədə çətinlik
• Ümumi halsızlıq vəziyyəti (asteniya)
• Diastolik qan təzyiqində düşmə
Bunlar SALİPRA-nın yüngül əlavə təsirləridir.
Əgər bu içlik vərəqədə göstərilməyən hər hansı bir əlavə təsir ilə qarşılaşsanız bu barədə həkiminizə
və ya tibb bacısına məlumat verin.
Doza həddinin aşılması
SALİPRA-dan istifadə etməli olduğunuzdan daha çox istifadə etmisinizsə, həkimə və ya əczaçıya
müraciət edin.
Buraxılış forması
2,5 ml-lik təkdozalı 20 flakon içlik vərəqə ilə birlikdə karton qutuya qablaşdırılır.
Saxlanma şəraiti
25°C-dən aşağı otaq temperaturunda, orijinal qutusunda, günəş işığından qorumaqla, uşaqların əli
çatmayan yerdə saxlamaq lazımdır. Dərmanın rəngində dəyişiklik varsa, istifadə edilməməlidir.
Yararlılıq müddəti
Yararlılıq müddəti qablaşdırıldığı qutunun üzərində göstərilmişdir.
Yararlılıq müddəti bitdikdən sonra istifadə etmək olmaz.
Son istifadə tarixi, göstərilən ayın son gününə şamil edilir.
Əgər preparatda və / və ya qablaşdırmasında qüsurlar aşkar etsəniz, SALİPRA-dan istifadə etməyin.
Aptekdən buraxılma şərti
Resept əsasında buraxılır.
İstehsalçı
VEM İlac San.ve Tic. A.Ş.
Çerkezköy Organize Sanayi Bölgesi,
Atatürk Mah., Fatih Bulvarı No:38.
Karaağaç - Çerkezköy,
Tekirdağ, Türkiyə.
Qeydiyyat vəsiqəsinin sahibi
VEM İlaç San. ve Tic. A.Ş.
Maslak Mahallesi AOS 55. Sokak,
42 Maslak A Blok Sit. No: 2/134.
Sarıyer/İSTANBUL/TÜRKİYƏ.