Pharmed
KORVALTAB EKSTRA N20 TB
KORVALTAB EKSTRA
KORVALTAB EKSTRA Tərkibi
Təsiredici maddə: 1 tabletin tərkibində 100 mq qvayfenezin, 3,5 mq doksilamin hidrogen suksinat, 8,2 mq α-bromizovalerian turşusunun etil efiri vardır. Köməkçi maddələr:nanə yağı, β- siklodekstrin, maltodekstrin, kopovidon, krospovidon, silisium dioksid (hidrofob kolloidal), sulu kolloidal silisium dioksid, maqnezium stearat. Örtük: ağ opadri II: polietilenqlikol, polivinil spirti, talk, titan dioksid (E 171).
Farmakoterapevtik qrupu
Yuxugətirici və sedativ vasitələr.
ATC kodu: N05CM.
Farmakoloji xüsusiyyətləri
Farmakodinamikası: Damargenişləndirici (koronarolitik), sedativ, yuxugətirici preparatdır. Mülayim antianginal təsir göstərir. Mərkəzi sinir sistemində oyanıqlığın zəifləməsinə səbəb olur, sakitləşdirici təsir göstərir və təbii yuxunun baş verməsini yüngülləşdirir. Preparatın tərkibinə daxil olan α-bromizovalerian turşusunun etil efiri spazmolitik və sedativ təsir göstərir; bundan əlavə, yüksək dozalarda zəif yuxugətirici effektin meydana çıxmasına səbəb olur. Qvayfenezin anksiolitik (həyəcanəleyhinə) təsir göstərir. Doksilamin hidrogen suksinat H1-histamin reseptorlarının blokatorudur və sedativ, hipnogen və allergiyaəleyhinə effektlərin meydana çıxmasına səbəb olur.
Farmakokinetikası: Qvayfenezin mədə-bağırsaq traktından sürətlə (30 dəqiqədən sonra) sorulur. Əsasən, tərkiblərində turş mukopolisaxaridlər olan toxumalara nüfuz edir. Peroral yolla istifadə edildikdə, maksimal konsentrasiyası 1-2 saatdan sonra əldə edilir, terapevtik konsentrasiyası isə 6 saat müddətində saxlanılır. Qvayfenezinin yarımxaricolma dövrü təxminən 1 saat təşkil edir. Bəlğəmlə ekskresiya olunur və metabolitlər şəklində və eləcədə, dəyişilməmiş halda orqanizmdən böyrəklər vasitəsi ilə xaric olunur. Preparatı daxilə qəbul etdikdə, doksilamin hidrogen suksinatın qan plazmasında maksimal konsentrasiyası (Cmax), orta hesabla 2 saatdan sonra (Tmax) əldə edilir. Doksilaminin qan plazmasından yarımxaricolma dövrü (Т½) orta hesabla 10 saat təşkil edir. Doksilamin hidrogen suksinat demetilləşmə və N-asetilləşmə yolu ilə qaraciyərdə qismən metabolizmə məruz qalır. Yaşlı pasiyentlərdə və böyrək və ya qaraciyər çatışmazlığından əziyyət çəkən pasiyentlərdə preparatın yarımxaricolma dövrü əhəmiyyətli dərəcədə uzana bilər. Molekulun parçalanması zamanı əmələ gələn müxtəlif metabolitlər kəmiyyətcə əhəmiyyətli deyildir, çünki, istifadə edilən dozanın 60 %-i sidikdə dəyişilməmiş doksilamin şəklində aşkar olunur.
İstifadəsinə göstərişlər
- Neyroserkulyator distoniya-kompleks terapiyada.
- Yüksək qıcıqlanma ilə nevroz.
- Yüksək oyanıqlıq.
- Yüngül formalı yuxusuzluq.
- Qaşınma ilə müşayiət edilən dermatoz.
Əks göstərişlər
Preparatın tərkibinə daxil olan komponentlərdən hər hansı birinə qarşı və ya antihistamin preparatlara qarşı yüksək həssaslıq. Qaraciyər və böyrək funksiyalarının ağır pozğunluqları, qaraciyər porfiriyası. Pasiyentin anamnezində və ya ailə anamnezində qapalı bucaqlı qlaukomanın qeyd olunması. Sidiyin orqanizmdə ləngiməsi riski ilə müşayiət olunan uretroprostatik pozğunluqlar. Ağır ürək çatışmazlığı. Depressiya və mərkəzi sinir sisteminin fəaliyyətinin tormozlanması ilə müşayiət olunan digər pozğunluqlar.
Xüsusi göstərişlər və ehtiyat tədbirləri
Preparatın istifadəsi müddətində spirtli içkilərin istifadəsindən çəkinmək lazımdır. Başgicəllənmənin meydana çıxma riskini nəzərə alaraq, yaşlı pasiyentlərdə preparat ehtiyatla istifadə edilməlidir. Preparatla müalicə müddətində gecə apnoesi sindromu kəskinləşə bilər (tənəffüs dayanmasının tezliyinin və davametmə müddətinin artması). Bəzi hallarda sidiyin rənginin dəyişməsi müşahidə oluna bilər. Preparatın qəbulu müddətində sui-istifadə riski və dərmandan asılılığın inkişaf etmə riski aşağıdır. Lakin, sui-istifadə halları və bunun nəticəsində meydana çıxan dərmandan asılılıq halları barədə məlumatlar daxil olmuşdur. Dərman preparatının qəbulu ilə əlaqəli sui-istifadə və ya dərmandan asılılıq əlamətlərinə diqqətlə nəzarət edilməlidir. Anamnezlərində psixoaktiv maddələrin istifadəsi nəticəsində pozğunluqlar qeyd olunan pasiyentlərin müalicəsində preparatın istifadəsi tövsiyə olunmur. Doksilamin suksinat orqanizmdə 5 yarımxaricolma dövrü müddətində saxlanılır. Yaşlı pasiyentlərdə, böyrək və ya qaraciyər çatışmazlığından əziyyət çəkən paisyentlərdə preparatın yarımxaricolma dövrü əhəmiyyətli dərəcədə uzana bilər. Dəfələrlə təkrar istifadə edildikdə, dərman preparatının və ya onun metabolitlərinin tarazlıq vəziyyəti xeyli gec və daha yüksək səviyyədə əldə olunur. Dərman preparatının effektivliyi və təhlükəsizliyi tarazlıq vəziyyəti əldə olunduqdan sonra qiymətləndirilə bilər. Preparatın dozasının korreksiyası tələb oluna bilər (“İstifadə qaydası və dozası” bölməsinə bax). Yaşlı pasiyentlərdə əksər hallarda ciddi nəticələrlə müşayiət olunan yıxılmalar riskinin (məsələn, insanlar gecələr yuxudan oyanıb ayağa qalxanda) artmasına gətirib çıxaran koqnitiv pozğunluqların, sedativ effektin, reaksiyaların ləngiməsinin və/və ya başgicəllənmənin meydana çıxma riskini nəzərə alaraq, həmin kateqoriyadan olan pasiyentlərdə H1-antihistamin preparatlarını ehtiyatla istifadə etmək lazımdır. Böyrək və ya qaraciyər çatışmazlığından əziyyət çəkən yaşlı pasiyentlərdə qan plazmasında dərman preparatının konsentrasiyasının yüksəlməsi və klirensinin aşağı düşməsi müşahidə olunur. Preparatın dozasını azaltmaq tövsiyə edilir. Gün ərzində yuxuya meylliliyin qarşısını almaq məqsədi ilə yadda saxlamaq lazımdır ki, preparatın istifadəsindən sonra yuxunun davametmə müddəti 7 saatdan az olmamalıdır. Aşağıda göstərilən kateqoriyalardan olan pasiyentlərdə preparat ehtiyatla istifadə edilməlidir:
- astma, tütün istifadəsi, xroniki bronxit və emfizema ilə əlaqəli xroniki və ya fasiləsiz öskürək zamanı;
- böyrək funksiyalarının pozğunluqları qeyd olunan pasiyentlər;
- miasteniya qravis zamanı;
- kəskin mədə-bağırsaq pozğunluqları müşahidə olunan pasiyentlər.
Digər dərman vasitələri ilə qarşılıqlı təsiri
Aşağıda göstərilən kombinasiyaların istifadəsindən çəkinmək lazımdır Mərkəzi sinir sistemini tormozlayan digər dərman preparatları ilə eyni zamanda istifadə edildikdə, preparatların təsirlərinin qarşılıqlı güclənməsi və eləcədə, etanolun təsirinin güclənməsi müşahidə oluna bilər. Alkoqolun istifadəsi fonunda preparatın təsiri güclənir. Mərkəzi sinir sisteminin tormozlanmasının güclənməsini nəzərə alaraq, preparatın natrium oksibutiratla eyni zamanda istifadəsindən çəkinmək lazımdır. Nəqliyyat vasitəsini və ya digər potensial təhlükəli mexanizmləri idarə etdikdə, reaksiya sürətinin aşağı düşməsi təhlükəli ola bilər. Aşağıda göstərilən preparatlarla kombinasiyada istifadə etdikdə, qeyd olunan qarşılıqlı təsirləri nəzərə almaq lazımdır Atropin və atropinəbənzər dərman preparatları (imipramin sırasından olan antidepressantlar, atropinəbənzər H1-antihistamin preparatların əksəriyyəti, antixolinergik parkinsonizməleyhinə preparatlar, atropin tərkibli spazmolitik dərman preparatları, dizopiramid, fenotiazin tərkibli neyroleptiklər və eləcədə klozapin) – əlavə təsirlərin, məsələn, sidik ifrazının ləngiməsi, qəbizlik, ağızda quruluq hissi kimi effektlərin meydana çıxması mümkündür. Antidepressantlar, morfin törəmələri (ağrıkəsici preparatlar və öskürəyin müalicəsi üçün istifadə edilən preparatlar və əvəzedici müalicə), neyroleptiklər; barbituratlar, benzodiazepinlər, benzodiazepinlərdən başqa anksiolitiklər; sedativ antidepressantlar (amitriptillin, doksepin, mianserin, mirtazapin, trimipramin); digər yuxugətirici preparatlar, sedativ təsirli H1-antihistamin preparatlar; mərkəzi təsirli antihipertenziv preparatlar; baklofen, pizotifen, talidomid – mərkəzi sinir sisteminin tormozlanmasının güclənməsi ehtimal edilir. Nəqliyyat vasitəsini və ya digər potensial təhlükəli mexanizmləri idarə etdikdə, reaksiya sürətinin aşağı düşməsi təhlükəli ola bilər. Göstərilən dərman preparatı miorelaksantların təsirinin güclənməsinə səbəb ola bilər. Preparatın laborator analizlərin nəticələrinə təsiri Qvayfenezin sidikdə 5-hidroksiindolasetat turşusunun (nitrosonaftolun reagent şəklində istifadəsi ilə fotometrik metod) və vanil-badam turşusunun müəyyən edilməsi üçün istifadə edilən diaqnostik testlərin yanlış-müsbət nəticələrinin meydana çıxmasına səbəb ola bilər. Bunları nəzərə alaraq, göstərilən analizin aparılması üçün sidiyin toplanmasından 48 saat əvvəl, Korvaltab Ekstra preparatının istifadəsi ilə müalicəni dayandırmaq lazımdır.
Hamiləlik və laktasiya dövründə istifadəsi
Hamiləlik və laktasiya dövründə qadınlara preparat təyin edilməməlidir.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Müalicə dövründə avtomobil idarə etməkdən və sürətli psixomotor reaksiya tələb edən digər mexanizmlərdə işləməkdən çəkinmək lazımdır. Gündüz vaxtı yuxululuğun yaranması riskini nəzərə almaq vacibdir, xüsusilə nəqliyyat idarə edən və ya digər mexanizmlərlə işləyən şəxslər. Yuxunun müddəti kifayət qədər olmadıqda, reaksiya sürətinin azalması riski artır. Həmçinin “Digər dərman vasitələri ilə qarşılıqlı təsiri” bölməsinə bax.
KORVALTAB EKSTRA İstifadə qaydası və dozası
Dozalanması və müalicə kursunun müddəti həkim tərəfindən hər pasiyent üçün fərdi təyin edilir. Bir qayda olaraq, preparat sutkada 2-3 dəfə 1 tablet yeməkdən əvvəl təyin edilir. Yüngül formalı yuxusuzluq zamanı 1-2 tablet yatmazdan 30 dəqiqə əvvəl qəbul edilir. Uşaqlar: Uşaqlarda istifadə təcrübəsi yoxdur, bu səbəbə görə preparat pediatrik praktikada istifadə edilmir.
Əlavə təsirləri
Ayrı-ayrı hallarda aşağıdakı əlavə təsirlər müşahidə edilə bilər. Sinir sistemində baş verən pozuntular: asteniya, zəiflik, ataksiya, hərəkət koordinasiyasının pozulması, başağrı, yuxululuq, yüngül başgicəllənmə, şüurun dumanlanması, parodoksal oyanıqlıq, yorğunluq, reaksiyanın ləngiməsi, yuxusuzluq (yaşlı pasiyentlərdə), diqqətin cəmlənməsinin azalması.
Mədə-bağırsaq sistemində baş verən pozuntular: həzm sistemində diskomfort hissi, mədədə ağrı, ürəkbulanma, qusma, diareya, qəbizlik, ağızda quruluq, uzun müddətli istifadəsi zamanı qaraciyər funksiyasının pozulması.
İmmun sistemdə baş verən pozuntular: udmanın çətinləşməsi, üzün, dodaqların, dilin və ya boğazın ödemi, rinit, dəri səpgisi, övrə, qızdırma, koma, qranulositopeniya və anafilaktik şok kimi hiperhəssaslıq reaksiyaları.
Qan və limfa sistemində baş verən pozuntular: anemiya, meqaloblast anemiya, trombositopeniya, aqranulositoz.
Tənəffüs sistemində baş verən pozuntular: tənəffüsün çətinləşməsi, bronxospazm, təngnəfəslik.
Sidikçıxarıcı yollarda baş verən pozuntular: urolitiaz, sidikburaxmanın ləngiməsi.
Ürək-damar sistemində baş verən pozuntular: güclü ürəkdöyünmə, bradikardiya, arterial hipotenziya.
Görmə orqanında baş verən pozuntular: konyunktivit, gözün sulanması, nistaqm, görmənin pozulması (akkomodasiyanın pozulması, dumanlı görmə, halüsinasiya, görmə sahəsinin defekti).
Sui istifadə və dərman asılılığının yaranması halları barədə məlumat verilmişdir. Bundan başqa məlumdur ki, H1-antihistamin dərman vasitələri sedativ effektə, koqnitiv pozuntuya və psixomotor aktivliyin pozulmasına səbəb olur. Sadalanan hallar dozanın azaldılması zamanı və ya preparatın qəbulunu dayandırdıqda aradan qalxır. Preparatın yüksək dozaların uzun müddət qəbulu zamanı bromizmin inkişafı mümkündür. Əlavə təsirlər yarandıqda, məsləhət üçün həkimə müraciət etmək lazımdır.
Doza həddinin aşılması
Aşağıdakı hallar mümkündür: yuxululuq, zəiflik, başgicəllənmə, mədə-bağırsaq pozuntuları və antixolinergik effektin əlamətləri: oyanıqlıq, bəbəklərin genəlməsi, akkomodasiyanın iflici, ağızda quruluq, üzün və boyunun qızarması, hipertermiya, sinus taxikardiyası. Çox yüksək dozalar oyanıqlıq, şüurun dumanlanması və tənəffüsün zəifləməsi kimi simptomların yaranmasına səbəb ola bilər. Uzun müddət ərzində qvayfenezinin yüksək miqdarını qəbul edən pasiyentlərin sidik kisəsində və ya böyrəklərində daşların olması barədə nadir məlumatlar vardır. Tərkibində brom olan dərman vasitələrinin uzun müddət qəbulu bromla zəhərlənməyə səbəb ola bilər ki, bu da, aşağıdakı simptomlarla xarakterizə olunur: şüurun dumanlanması halı, ataksiya, apatiya, depressiv əhval-ruhiyyə, konyunktivit, soyuqdəymə, akne və ya purpura. Zəhərlənməni müalicə etmədikdə, damar çatışmazlığının, tənəffüs iflicinin və ya ağciyərlərin ödemi nəticəsində letal sonluq mümkündür. Müalicəsi: Dərman vasitəsinin qəbulunun dayandırılması, mədənin yuyulması və ürək-damar və tənəffüs sisteminin funksiyasını dəstəkləməyə yönəldilən simptomatik terapiya və elektrolit tarazlığın saxlanması. Brom ionlarının orqanizmdən xaric olmasınını əhəmiyyətli miqdarda xörək duzunun saluretik vasitələrlə eyni vaxtda yeridilməsilə sürətləndirmək olar. Spesifik antidotu yoxdur.
Buraxılış forması
10 tablet, blisterdə. 1 və ya 2 blister, içlik vərəqə ilə birlikdə karton qutuya qablaşdırılır.
Aptekdən buraxılma şərti
Reseptsiz buraxılır.