Pharmed
FLOKSIMED 0,3% 5GR MELHEM
FLOXIMED
Beynəlxalq patentləşdirilməmiş adı: Ciprofloxacin
Tərkibi
Təsiredici maddə: 1 q məlhəmin tərkibində 3,0 mq siprofloksasin (siprofloksasin hidroxlorid
şəklində) vardır.
Köməkçi maddələr: lanolin, xlorbutanol, sarı yumşaq parafin.
Təsviri
Sarımtıl-ağ rəngli, homogen, yarımbərk yağlı məlhəmdir.
Farmakoterapevtik qrupu
Oftalmologiyada istifadə olunan vasitələr. Mikrobəleyhinə vasitələr. Flüorxinolonlar.
ATC kodu: S01AX13.
Farmakoloji xüsusiyyətləri
Farmakodinamikası
Təsir mexanizmi
Floksimedin tərkibində siprofloksasin (flüorxinolon) var. Siprofloksasinin bakterisid və bakteriostatik
təsiri bakteriyaların DNT sintezi üçün istifadə etdikləri DNT-giraza fermentinin inaktivləşməsi ilə
şərtlənir. Nəticədə bakteriya hüceyrə xromosomlarından məlumatın hesablanması pozulur ki, bu isə
öz növbəsində bakteriya hüceyrə metabolizminin pozulmasına gətirib çıxarır. Siprofloksasin geniş
spektrli qrammüsbət və qrammənfi mikroorqanizmlərə qarşı in vitro ifadəli antibakterial aktivlik
göstərir.
Farmakokinetik/farmakodinamik qarşılıqlı təsirləri
Buynuz qişada antibakterial maddənin effektivliyi yalnız mikroorqanizmin MIC90 (minimal
inhibəedici konsentrasiya, ştammların 90% artımını ləngidir) –dən asılı deyil, həmçinin stroma
hüceyrələrində preparatın konsentrasiyasından asılıdır. Göz irriqasion məhlulların tərkibində olan
metal ionları flüorxinolonların biomənimsənilməsini əhəmiyyətli dərəcədə azalda bilir. Beləliklə, ağır
göz infeksiyaları zamanı siprofloksasinin klinik effektivliyi, preparatın metal ionları ilə qarşılıqlı təsiri
səbəbindən, antimikrob preparatlara qarşı həssaslığın laborator müayinələri zamanı alınan nəticələrə
nisbətən aşağı ola bilər.
Siprofloksasinə qarşı həssaslıq
Ayrı-ayrı növ bakteriyalarda qazanılmış davamlılığın yayılması zamana və cooğrafi yerləşməyə görə
dəyişə bilər; bununla əlaqədar rezistentlik barədə yerli məlumatların əldə olunması lazımdır, xüsusən
ciddi infeksiyaların müalicəsi zamanı. Ehtiyac olduqda, davamlı ştammların yayılması barədə yerli
məlumat olduqda və ən azı bəzi infeksiyalara qarşı dərman vasitəsi istifadəsinin faydası şübhə altında
olduqda, məsləhət üçün ekspertə müraciət etmək lazımdır. Aşağıda gözün xarici infeksion xəstəlikləri
zamanı ayırd edilən bakteriya növləri sadalanmışdır.
Adətən həssas növlər
- qrammüsbət aerob mikroorqanizmlər: Corynebacterium accolens, Corynebacterium auris,
Corynebacterium propinquum, Corynebacterium psudodiphtheriticum, Corynebacterium striatum,
Staphylococcus aureus (metisillinhəssas - MSSA), Staphylococcus capitis, Staphylococcus
epidermidis (metisillinhəssas - MSSE), Staphylococcus hominis, Staphylococcus saprophyticus,
Staphylococcus warneri, Streptococcus pneumoniae, Streptococcus viridans (qrupu);
- qrammənfi aerob mikroorqanizmlər: Acinetobacter species, Haemophilus influenzae, Moraxella
catarrhalis, Pseudomonas aeruginosa, Serratia marcescens.
Rezistentlik qazana bilən mikroorqanizm növləri
- qrammüsbət aerob mikroorqanizmlər: Staphylococcus aureus (metisillinrezistent – MRSA),
Staphylococcus epidermidis (metisillinrezistent – MRSE), Staphylococcus lugdunensis;
- qrammənfi aerob mikroorqanizmlər: yoxdur;
- digər mikroorqanizmlər: yoxdur.
Anadangəlmə (birincili təbii) davamlı mikroorqanizmlər
- qrammüsbət aerob mikroorqanizmlər: Corynebacterium jeikium;
- qrammənfi aerob mikroorqanizmlər: yoxdur;
- digər mikroorqanizmlər: yoxdur.
Rezistentliyin yaranması mexanizmi
Flüorxinolonlara qarşı, əsasən siprofloksasinə qarşı davamlılıq beş əsas bakterial mexanizmlərdən bir
və ya bir neçəsində dəyərli genetik modifikasiyalar tələb edir: a) DNT sintezi fermentlərində, b)
müdafiə zülallarında, c) hüceyrə keçiriciliyində, d) dərman vasitəsinin axınında və ya e) plazmida
AAC (6 ') - 1b vasitəli aminoqlikozid-6'-N-asetiltransferazada.
Flüorxinolonlar, o cümlədən siprofloksasin aminoqlikozidlərdən, β-laktamlardan, makrolidlərdən,
tetrasiklinlərdən, sulfonamidlərdən, trimetoprim və xloramfenikoldan kimyəvi strukturuna və təsir
mexanizminə görə fərqlənirlər. Nəticədə, bu dərman preparatlarına qarşı rezistent mikroorqanizmlər
siprofloksasinə qarşı həssas ola bilərlər.
Pediatrik populyasiya
1 yaşdan 12 yaşa qədər uşaqlarda 3 mq/q konsentrasiyada göz məlhəmi şəklində siprofloksasinin
istifadəsinin effektivliyi və təhlükəsizliyi 103 uşağın iştirak etdiyi klinik tədqiqatlarda təsdiq
olunmuşdur. Bu qrup pasiyentlərdə ciddi əlavə təsirlərin yaranması qeyd olunmayıb.
Farmakokinetikası
Göz damcısının yerli istifadəsindən sonra göz toxumasında siprofloksasin sürətlə sorulur.
Dovşanlarda pik konsentrasiyalar əksər toxumalarda 0,5-2 saat ərzində əldə olunmuşdur. Yerli
istifadədən sonra sistem konsentrasiyalar aşağı olmuşdur. Siprofloksasin 0,3% məhlulunun 2 damcı
iki gün ərzində hər 2 saatdan bir, daha sonra beş gün ərzində hər 4 saatdan bir damızdırmadan sonra
insanlarda plazamada siprofloksasinin səviyyələri cüzi (< 1,0 mkq/ml) – 4,7 mkq/ml-ə qədər
dəyişmişdir. Bu tədqiqat zamanı əldə olunan plazmada siprofloksasinin orta maksimal
konsentrasiyası, 250 mq siprofloksasinin birdəfəlik daxilə qəbuluna nisbətən təxminən 450 dəfə
aşağıdır. Siprofloksasinin sistem farmakokinetik xüsusiyyətləri yaxşı öyrənilmişdir. Siprofloksasin
orqanizmin toxumalarında geniş paylanır. Tarazlıq vəziyyətində təxminən paylanma həcmi 1,7-5,0
l/kq təşkil edir. Zərdab zülalı ilə birləşməsi 20-40% təşkil edir. Siprofloksasinin plazmadan
yarımxaricolma 3-5 saat təşkil edir. Həm siprofloksasin, həm də onun dörd əsas metaboliti sidiklə və
nəcislə xaric olunur. Böyrək klirensi ümumi klirensin üçdə iki hissəsini təşkil edir, ödlə və nəcislə
xaricolma qalan faizi təmin edir. Böyrək çatışmazlığı olan pasiyentlərdə ekstrarenal eliminasiya
nəticəsində siprofloksasinin yarımxaricolma dövrü yalnız cüzi artır. Bu şəkildə, ağır qaraciyər
çatışmazlığı olan pasiyentlərdə yarımxaricolma dövrü həmçinin cüzi artır.
Siprofloksasin göz məlhəmi şəklində (3 mq/q) yerli oftalmoloji istifadəsindən sonra siprofloksasinin
farmakokinetikası və sistem təsir səviyyələri öyrənilməyib.
İstifadəsinə göstərişlər
Böyüklər və 1 yaşdan yuxarı uşaqlar
Floksimed “Farmakodinamika” bəndində sadalanan, həssas mikroorqanizm ştammlarının törətdiyi
konyunktivit və digər göz infeksiyalarının müalicəsi üçün nəzərdə tutulmuşdur. Göz məlhəminin
istifadəsi yerli antibakterial terapiya effektivliyinin müvafiq kontrolu ilə müşayiət olunmalıdır.
Bu preparatın istifadəsi zamanı antibakterial vasitələrin müvafiq istifadəsi üzrə rəsmi tövsiyyələri
nəzərə almaq lazımdır.
Əks göstərişlər
- Təsiredici maddəyə və ya köməkçi maddələrdən hər-hansı birinə qarşı yüksək həssaslıq;
- xinolonlara qarşı yüksək həssaslıq.
Xüsusi göstərişlər və ehtiyat tədbirləri
Preparat yalnız oftalmoloji istifadə üçün nəzərdə tutulub. Udmaq olmaz. 1 yaşa qədər uşaqlarda
istifadə təcrübəsi yoxdur.
Göz məlhəminin istifadəsi zamanı preparatın burun-udlağa düşməsini nəzərə almaq lazımdır, bu isə
bakterial rezistentliyin yaranması və yayılmasına səbəb ola bilər.
Qonokokklar və ya xlamidiyaların törətdiyi neonatal oftalmiyası olan yenidoğulmuşlarda göz
məlhəminin istifadəsi belə pasiyentlərin vəziyyəti qiymətləndirilənə qədər tövsiyyə olunmur.
Yenidoğulmuşların oftalmiyası olan körpələr vəziyyətinin ağırlığından asılı olaraq müalicə qəbul
etməlidirlər.
Xinolonları peroral qəbul edən pasiyentlərdə artıq birinci dozadan sonra yaranan, letal nəticələrə
qədər inkişaf edən ağır hiperhəssaslıq reaksiyaları (anafilaksiya) barədə məlumat verilmişdir. Bəzi
reaksiyalar ürək-damar kollapsı, huşun itirilməsi, sancma, udlaq və ya üzün şişkinliyi, təngnəfəslik,
övrə və qaşınma ilə müşayiət olunmuşdur. Bu pasiyentlərin yalnız bəzilərinin anamnezində yüksək
həssaslıq reaksiyaları olmuşdur.
Siprofloksasinə qarşı ağır kəskin hiperhəssaslıq reaksiyaları klinik göstərişlərə uyğun olaraq oksigen
terapiyasının və ağciyərlərin süni ventilyasiyasının istifadəsilə təxirəsalınmaz təcili müalicə tələb
edir.
Dəridə səpgilərin ilk əlamətləri və ya yüksək həssaslıq reaksiyaların digər əlamətləri yaranan zaman
siprofloksasinin istifadəsini dayandırmaq lazımdır.
Hər-hansı digər antibakterial preparatların istifadəsində olduğu kimi siprofloksasinin davamlı
istifadəsi ona qarşı qeyri-həssas mikroorqanizmlərin və ya göbələklərin artmasının aktivləşməsinə
gətirib çıxara bilər. Superinfeksiya yaranan zaman müvafiq müalicə təyin olunmalıdır. Klinik
göstərişlər üzrə, ehtiyac olduqda yarıq lampası ilə biomikroskopiya və flüoressein sınağı kimi geniş
müayinələrin tətbiqi ilə pasiyentlərin vəziyyətini qiymətləndirmək lazımdır.
Siprofloksasin daxil olmaqla, flüorxinolonlar ilə sistem terapiya zamanı vətərlərin iltihabı və
qırılması mümkündür, xüsusən yaşlı pasiyentlərdə, həmçinin kortikosteroidlər ilə yanaşı terapiya
qəbul edən pasiyentlərdə. Bu səbəbdən, vətərlərin iltihabının ilk əlamətləri yarandıqda Floksimed göz
məlhəminin istifadəsilə terapiyanı dayandırmaq lazımdır.
Göz məlhəminin tez-tez istifadəsi zamanı buynuz qişanın xorası olan pasiyentlərdə ağ rəngli ərp
(preparatın qalıqları) müşahidə olunmuşdur. Məlhəmin istifadəsinə davam etdikdə bu ərp itmişdir.
Bu göz məlhəminin daha sonra istifadəsinin dayandırılması üçün əsas deyildir və sağalma prosesinin
davam etməsinə mənfi təsir göstərmir.
Göz infeksiyasının müalicəsi zamanı kontakt linzaların taxılması məsləhət görülmür. Bununla
əlaqədar pasiyentlərə məsləhət görülməlidir ki, Floksimed göz məlhəmi ilə müalicə zamanı kontakt
linzalardan istifadə etməsinlər.
Digər dərman vasitələri ilə qarşılıqlı təsiri
Qarşılıqlı təsir tədqiqatları aparılmayıb.
Yerli oftalmoloji istifadəsi zamanı siprofloksasinin sistem konsentrasiyasının aşağı olması nəzərə
alınmaqla, dərman qarşılıqlı təsiri ehtimalı çox azdır.
Bir neçə oftalmoloji preparatın eyni vaxtda istifadəsi zamanı istifadələr arasında interval ən azı 5
dəqiqə təşkil etməlidir. Göz məlhəmləri son növbədə istifadə edilməlidir.
Hamiləlik və laktasiya dövründə istifadəsi
Hamiləlik
Siprofloksasin göz məlhəminin hamilə qadınlarda istifadəsinə dair məlumatlar yoxdur və ya məhdud
saydadır. Heyvanlarda siprofloksasinin peroral istifadəsinə aid aparılan tədqiqatların nəticələrinə
əsasən reproduktiv funksiyaya birbaşa arzuolunmaz təsiri qeyd olunmur.
Ehtimal olunur ki, yerli istifadəsindən sonra siprofloksasinin sistem təsiri cüzidir. Ehtiyat tədbiri kimi
Floksimed-in hamiləlik zamanı istifadəsindən qaçmaq lazımdır, yalnız ehtimal edilən terapevtik
effektin döl üçün potensial riskdən üstün olduğu hallar istisna olmaqla.
Laktasiya
Daxilə qəbul olunduqdan sonra siprofloksasin ana südünə nüfuz edir. Yerli oftalmoloji istifadədən
sonra siprofloksasinin ana südünə keçməsi məlum deyildir. Yenidoğulmuşlar/körpələr üçün risk
istisna olunmur.
Müalicə zamanı ana südü ilə qidalandırmanın dayandırılması və ya Floksimed ilə müalicənin
dayandırılması/imtina edilməsi barədə qərar qəbul etmək lazımdır, bu zaman uşaq üçün ana südü ilə
qidalandırmanın faydası və qadın üçün müalicənin faydası nisbəti nəzərə alınmalıdır.
Nəslartırma qabiliyyəti (fertillik)
Siprofloksasinin yerli istifadəsinin insanda fertilliyə təsirinin qiymətləndirilməsi üzrə tədqiqatlar
aparılmayıb.
Heyvanlarda siprofloksasinin peroral istifadəsinə dair tədqiqatların nəticələri reproduktiv funksiyaya
birbaşa arzuolunmaz təsirini göstərmir.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Floksimed avtomobil və potensial təhlükəli mexanizmləri idarəetmə qabiliyyətinə təsir göstərmir və
ya cüzi təsir göstərir.
İstənilən göz damcısının istifadəsində olduğu kimi, görmənin müvəqqəti qeyri-aydın olması və ya
digər görmə pozğunluqları nəqliyyat vasitələri və ya digər mexanizmləri idarəetmə qabiliyyətinə təsir
göstərə bilir. Əgər preparatın istifadəsindən sonra görmənin qeyri-aydın olması baş verərsə, nəqliyyat
vasitələrini və ya digər mexanizmləri idarə etməzdən öncə pasiyent gözləməlidir ki, görmə tam bərpa
olunsun.
İstifadə qaydası və dozası
Tubun ucluğunun və məlhəmin özünün çirklənməsinin qarşısını almaq üçün diqqət etmək lazımdır
ki, ucluq göz qapaqlarına, üzün yanaşı hissələrinə və digər səthlərə toxunmasın. İstifadədən sonra
tubu kip bağlamaq lazımdır.
Bir neçə oftalmoloji preparatların eyni vaxtda istifadəsi zamanı istifadələr arasında interval ən azı 5
dəqiqə təşkil etməlidir. Göz məlhəmləri ən axırda istifadə olunmalıdır.
Dozalanması
Böyüklər və 1 yaşdan yuxarı uşaqlar: 1,25 sm məlhəm zədələnmiş gözün konyunktiva kisəsinə (və
ya göz qapağı kənarına) yeridilir, 2 gün ərzində gündə 3 dəfə, daha sonra ardıcıl 5 gün ərzində gündə
2 dəfə. Vəziyyətin yaxşılaşmasından sonra müalicəni 2 gün ərzində davam etmək lazımdır. Həkim
məsləhətinə görə dozalanmanı artırmaq olar.
Tubun içindəki məlhəmin çirklənməsinin qarşısını almaq üçün tub dəliyini hər-hansı səthə
toxundurmamaq gərəkdir.
1 yaşa qədər uşaqlar
1 yaşdan kiçik uşaqlarda göz məlhəminin istifadəsinin təhlükəsizliyi və effektivliyi müəyyən
olunmayıb.
Yaşlı pasiyentlər
Klinik tədqiqatlar göstərmişdir ki, yaşlı pasiyentlərdə istifadəsi zamanı dozanın korreksiyası tələb
olunmur.
Qaraciyər və böyrək çatışmazlığı olan pasiyentlər
Qaraciyər və ya böyrəklərin funksiyasının pozulmaları olan pasiyentlərdə preparatın istifadəsinin
qiymətləndirilməsi üzrə tədqiqatlar aparılmayıb.
Əlavə təsirləri
Klinik tədqiqatlarda daha tez-tez rast gəlinən əlavə təsirlər gözdə diskomfort, disgevziya (dadbilmə
hissinin pozulması) və buynuz qişada presipitat (ağ ərp) olmuşdur ki, bu isə müvafiq olaraq
pasiyentlərin təxminən 6%, 3% və 3%-də müşahidə olunmuşdur.
Əlavə təsirlərin tezlik parametrləri aşağıdakı kimi müəyyən olunmuşdur: çox tez-tez (≥1/10); tez-tez
(≥1/100, lakin <1/10); bəzən (≥1/1000, lakin <1/100); nadir (≥1/10000, lakin <1/1000); çox nadir
(<1/10000); tezliyi məlum deyil (əldə olan məlumatlar əsasında qiymətləndirmək mümkün olmur).
Hər bir qrupda əlavə təsirlər onların rastgəlmə tezliyinin azalması sırası ilə sadalanmışdır.
İmmun sistemı: nadir – hiperhəssaslıq.
Sinir sisteminə: bəzən- başağrısı; nadir- başhərlənmə.
Görmə orqanına: tez-tez- ağ ərp (buynuz qişada presipitat), gözdə diskomfort, konyunktivanın
hiperemiyası; bəzən – keratopatiya, nöqtəvi keratit, buynuz qişanın infiltratları, işıqdanqorxma,
görmə itiliyinin zəifləməsi, göz qapaqlarının şişkinliyi, görmənin dumanlanması, gözdə ağrı, gözdə
quruluq, konyunktiva və göz qapaqlarının şişkinliyi, gözdə qaşınma, gözdən yaşaxma, gözdən
ifrazatın gəlməsi, göz qapağı kənarlarında qartmağın yaranması, göz qapağı dərisinin qabıqlanması,
göz qapaqlarının hiperemiyası, gözlərin qızarması; nadir – görmə orqanı tərəfindən toksiki hallar,
keratit, konyunktivit, buynuz qişa epitelisinin qüsuru, diplopiya, buynuz qişa həssaslığının azalması,
astenopiya, itdirsəyi, gözlərin qıcıqlanması, gözün iltihabi xəstəlikləri.
Eşitmə və müvazinət orqanına: nadir – qulaqlarda ağrı.
Tənəffüs sistemi, döş qəfəsi və divararalığı orqanlarına: nadir- burunətrafı ciblərin selikli qişasının
sekresiyasının artması, rinit.
Mədə-bağırsaq sisteminə: tez-tez- disgevziya; bəzən- ürəlbulanma; nadir – qarında ağrı, diareya.
Dəriyə və dərialtı toxumalara: nadir – dermatit.
Skelet-əzələ və birləşdirici toxumaya: tezliyi məlum deyil – bağ apparatı tərəfindən pozulmalar.
Ayrı-ayrı əlavə təsirlərin təsviri
Flüorxinolonların yerli istifadəsi zamanı ayrı-ayrı hallarda səpgi (generalizəolunmuş), toksiki
epidermoliz, eksfoliativ dermatit, Stivens-Conson sindromu və övrə hadisələri qeyd olunmuşdur.
Siprofloksasinin oftalmoloji istifadəsi zamanı tək-tək hallarda görmənin dumanlanması, görmə
itiliyinin azalması və buynuz qişa səthində preparatın qalıq miqdarının olması qeyd olunmuşdur.
Flüorxinolonları peroral qəbul edən pasiyentlərdə ciddi anafilaktik reaksiyalar, nadir hallarda ölümlə
nəticələnmə, o cümlədən, ilk dozanın istifadəsindən sonra qeyd olunmuşdur. Bu reaksiyaların bəziləri
ürək-damar kollapsı, huşun itməsi, sancma, qırtlaq və üzdə şişkinlik, təngənəfəslik, övrə və qaşınma
ilə müşayiət olunmuşdur.
Flüorxinolonları peroral qəbul edən pasiyentlərdə bazu oynağı vətərlərinin, əl-bilək oynağı
vətərlərinin, axill vətərinin və digər vətərlərin qırılması qeyd olunmuşdur ki, bunun nəticəsində
cərrahi müdaxilələr tələb olunmuş və ya uzunmüddətli əlilliyə gətirib çıxarmışdır. Sistem
flüorxinolonların tədqiqi və bu məhsulların postmarketinq istifadə təcrübəsi göstərir ki, vətərlərin belə
qırılması riski kortikosteroidlər qəbul edən pasiyentlərdə, xüsusən geriatrik pasiyentlərdə yüksələ
bilər, və daha çox yüklənməyə məruz qalan vətərlərə, əsasən, axill vətərinə toxunur.
Hal-hazırda klinik tədqiqatlardan əldə olunan məlumatlar və postmarketinq müşahidələr
siprofloksasinin yerli istifadəsi (göz məlhəmi şəklində) və skelet-əzələ və birləşdirici toxuma
tərəfindən əlavə təsirlər arasında aşkar korrelyasiyanı aşkar etməmişdir.
Xinolonların sistem istifadəsinin gedişi zamanı orta və ağır dərəcəli fototoksiklik reaksiyaları qeyd
olunmuşdur. Lakin siprofloksasin üçün belə reaksiyalar xarakter deyildir.
Ağ rəngli ərp (preparatın qalıqları) buynuz qişanın xorası olan pasiyentlərdə məlhəmin tez-tez
istifadəsi zamanı müşahidə olunmuşdur. Sonrakı istifadə zamanı bu ərp keçib getmişdir. Bu preparatın
istifadəsinin dayandırılması üçün əsas deyildir və sağalma prosesinin davam etməsinə mənfi təsir
göstərmir.
Pediatrik populyasiya
1 yaşdan 12 yaşa qədər uşaqlarda 3 mq/q konsentrasiyada göz məlhəmi şəklində siprofloksasinin
istifadəsinin effektivliyi və təhlükəsizliyi 103 uşağın iştirak etdiyi klinik tədqiqatlarda təsdiq
olunmuşdur. Bu qrup pasiyentlərdə ciddi əlavə təsirlərin yaranması qeyd olunmamışdır.
Doza həddinin aşılması
Simptomları
Doza həddinin aşılması hadisələri barədə məlumatlar mövcud deyildir.
Bu preparatın xüsusiyyətləri nəzərə alınmaqla, oftalmoloji istifadəsi və ya tubda olan preparatın
təsdüfən daxilə qəbul edilməsi zamanı doza həddinin aşılması hadisəsində toksiki effekt az ehtimal
olunur.
Müalicəsi
Yerli istifadəsi zamanı doza həddi aşıldıqda məlhəmin artıq hissəsini kənarlaşdırmaq, gözləri ilıq su
ilə yumaq lazımdır. Hər-hansı təsirin müalicəsi: simptomatik və dəstəkləyici olmalıdır.
Buraxılış forması
5 q məlhəm, alüminium tubda. 1 tub içlik vərəqə ilə birlikdə karton qutuya qablaşdırılır.
Saxlanma şəraiti
25°С-dən yüksək olmayan temperaturda və uşaqların əli çatmayan yerdə saxlamaq lazımdır.
Tubu açdıqdan sonra preparatı bir ay ərzində istifadə etmək olar.
Yararlılıq müddəti
2 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Resept əsasında buraxılır.
İstehsalçı
“E.I.P.I.Co.”, Egypt, Tenth of Ramadan City, First Industrial Area B1, P.O. box: 149 Tenth.
Qeydiyyat vəsiqəsinin sahibi
«VÖRLD MEDİSİN OFTALMİKS», BÖYÜK BRİTANİYA.