Pharmed
AZARGA 10/5MG 5ML GOZ DAMLASI
TƏSDİQ EDİLMİŞDİR
Azərbaycan Respublikası
Səhiyyə Nazirliyi
Farmakoloji və Farmakopeya
Ekspert Şurasının sədri
_____________ E.M.Ağayev
“_____”____________ 2021-ci il
Dərman vasitəsinin istifadəsi üzrə təlimat (xəstələr üçün)
AZARQA göz damcısı, steril suspenziya
AZARGA®
Beynəlxalq patentləşdirilməmiş adı: Brinzolamide + timolol
Tərkibi
Təsiredici maddələr:1 ml preparatın tərkibində 10 mq brinzolamid və 5 mq timolol (6,8 mq
timolol maleat şəklində) vardır.
Köməkçi maddələr: benzalkonium xlorid (50%-li məhlul şəklində), dinatrium edetat, natrium
xlorid, tiloksapol, mannitol, karbomer (974P), natrium hidroksid və / və ya
xlorid turşusu, təmizlənmiş su.
Təsviri
Ağ -ağımtıl homogen suspenziyadır.
Farmakoterapevtik qrupu
Qlaukoma əleyhinə kombinəedilmiş (karboanhidrazanın inhibitoru + beta-adrenoblokator)
dərman vasitəsi və miotiklər.
АТC kodu: S01ED51.
Farmakoloji xüsusiyyətləri
Farmakodinamikası
AZARQA dərman vasitəsi iki təsiredici maddədən: brinzolamid və timolol maleatdan ibarətdir. Bu iki
komponent, fərqli təsir mexanizmləri ilə gözdaxili mayeni azaldaraq, artmış gözdaxili təzyiqi aşağı
salırlar. İki təsiredici maddənin kombinə effekti, bu maddələrin təklikdə göstərdiyi təsirlə müqayisədə
GDT azalmasında əlavə təsir yaradır.
Brinzolamid, gözlərdə üstünlük təşkil edən izo-ferement, insan karboanhidraza II-nin güclü
inhibitorudur.
Karboanhidraza II-nin inhibə olunması nəticəsində bikarbonat ionlarının əmələ gəlməsinin ləngiməsi,
ardınca isə natrium və mayenin nəqlinin azalması baş verir, bu isə gözün siliar cismində gözdaxili
maye ifrazının azalmasına gətirib çıxarır.
Timolol – beta-adrenoreseptorların simpatomimetik aktivliyə malik olmayan qeyri-selektiv
blokatorudur, miokarda birbaşa depressiv təsir göstərmir, membranstabilləşdirici aktivliyə malik deyil.
Kişilər arasında tonoqrafiya və flüorofotometriya tədqiqatları maddənin predominant təsirinin əmələ
gələn gözdaxili maye yaranmasının azalması və maye axınının yüngül artması ilə əlaqələndirilir.
Klinik təsirlər
Açıq-bucaqlı qlaukoma və ya okulyar hipertoniyası olan həmçinin kombinə müalicədən yararlana
biləcək və gözdaxili təzyiqin orta başlanğıc göstəricisi 25-27 mm c.st olan xəstələrin iştirakı ilə
aparılmış 12-aylıq, nəzarət olunan klinik tədqiqatlarda, AZARQA göz damcısnın (gündə iki dəfə
dozalanma rejimi) GDT-i orta azaltma təsiri 7-9 mm c. st. olmuşdur. Dorzolamid 20 mq/ml +timolol 5 mq/ml ilə müqayisədə AZARQA-nın təsiri az olmamışdır. GDT-in orta azalaması həkim müayinələrinin
hər birində müşahidə edilmişdir.
Açıq-bucaqlı qlaukoma və ya okulyar hipertoniya ilə orta GDT göstəricisi 25-27 mm.c.st olan xəstələrin
iştirakı ilə aparılan 6-aylıq, nəzarət olunan klinik tədqiqatlarda AZARQA itifadəsinin nəticəsində GDT-
in orta azalması 7-9 mm c.st. təşkil etmişdir. Bu isə öz növbəsində gündə iki dəfə yalnız 10 mq/ml
brinzolamidin təsiri ilə müqayisədə 3 mm.c.st. və gündə iki dəfə yalnız 5 mq/ml timolol təsiri ilə
müqayisədə 2 mm c.st. yüksək olmuşdur. Tədqiqat boyu bütün müayinələrdə AZARQA, həm
brinzolamid, həm də timololla müqayisədə GDT-in orta azalma göstəricisində statistik cəhətdən
üstünlük nümayiş etdirmişdir.
Dorzolamid 20 mq/ml+ timolol 5 mq/ml və AZARQA göz damcılarının istifadəsi ilə aparılan üç
nəzarətli klinik tədqiqatlarda göz damcısının istifadəsi ilə yaranan okulyar diskomfort AZARQA
qrupunda əhəmiyyətli şəkildə aşağı olmuşdur.
Farmakokinetikası
Yerli istifadədən sonra brinzolamid və timolol buynuz qişa vasitəsilə sorularaq sistem qan dövranına
daxil olur. Farmakokinetik tədqiqatlarda, AZARQA göz damcısının istifadəsindən əvvəl tarazlıq
vəziyyətini əldə etmək üçün sağlam şəxslər iki həftə ərzində gündə iki dəfə 1 mq peroral brinzolamid
qəbul etmişdir. 13 həftə ərzində hər iki gözə gündə iki dəfə AZARQA göz damcısının istifadəsindən
sonra brinzolamidin eritrositlərdə konsentrasiyası 4, 10, 15-ci həftələrdə müvafiq olaraq 18.8±3.29µM,
18.1±2.68µM və 18,4±3,01µM olmuşdur. Bu da brinzolamidin eritrositlərdə tarazlıq vəziyyətində
səviyyəsinin saxlanılmasını göstərir (eritrositlərdə karboanhidraza II saturasiyası təqribən 20 µM təşkil
edir). AZARQA göz damcısının istifadəsindən sonra Cmax və Tmax müvafiq olaraq 0.824 ng/ml və
0.79 saat təşkil etmişdir.
Plazma zülalları ilə birləşməsi təqribən 60% təşkil edir.
Brinzolamidin metabolizmi N-dealkilləşmə, О-dealkilləşmə və N-propil yan zəncirinin oksidləşməsi
yolu ilə baş verir. Əsas metabolit - N-dezetilbrinzolamid, əsasən brinzolamid olduqda karboanhidraza I
ilə birləşir və həmçinin eritrositlərdə toplanır. İn vitro tədqiqatlar göstərir ki, brinzolamidin
metabolizminə, başlıca olaraq, CYP3A4 izofermenti, eləcə də CYP2A6, CYP2В6, CYP2С8 və
CYP2С9 izofermentləri cavab verir.
Timololun metabolizmi iki yolla baş verir: tiadiazol həlqədə etanolamin yan zəncirinin yaranması və
morfolinin azotunun etanol yan zəncirinin formalaşması və azot ilə birləşmiş karbonil qruplu anoloji yan
zəncirinin formalaşması ilə baş verir. Timololun metabolizmi əsasən CYP2D6 izofermenti ilə həyata
keçir.
14C Brinzolamid sidik və nəcislə, müfaviq olaraq 32% və 29 % xaric olunur. Dozanın 20%-ə yaxın
hissəsi sidikdə metabolit şəklində: əsas metabolit (N-dezetilbrinzolamid) və digər metabolitlərin (N-
dezmetoksipropil və O-desmetil) iz konsentrasiyaları ilə aşkarlanır. Timolol və metabolitləri əsasən
böyrəklərlə xaric edilir. Timololun təqribən 20% sidiklə dəyişilməmiş şəkildə və qalan hissəsi
metabolitlər şəklndə xaric edilir. Timololun T1/2-i AZARQA-nın yerli istifadəsindən sonra 4,8 saat təşkil
edir.
Ayrı-ayrı qrup xəstələrdə farmakokinetikası
Uşaqlar
AZARQA dərman vasitəsi uşaqlarda öyrənilməmişdir.
Yaşlı xəstələr
Böyük xəstələrlə müqayisədə yaşlı xəstələrdə preparatın təhlükəsizlik və effektivliyinə dair fərq
müşahidə edilməmişdir.
Gender
AZARQA-nın yerli istifadəsindən sonra, brinzolamid, N-desetil brinzolamid və ya timololun sistem
ekspozisiyasında gendera əsasən klinik əhəmiyyətli fərq qeyd edilməmişdir.
İrq
Preparatın effektivliyi və təhlükəsiziyində irqə əsasən fərqin olması ehtimal edilmir.
Qaraciyər və böyrək çatışmazlığı
AZARQA, qaraciyər və ya böyrək çatışmazlığı olan xəstələrdə öyrənilməmişdir.
İstifadəsinə göstərişlər
Monoterapiyanın kifayət etmədiyi və kombinəolunmuş terapiyanın məqsədəuyğun olduğu xəstələrdə
açıqbucaqlı qlaukoma və ya gözdaxili hipertenziya zamanı gözdaxili təzyiqin azaldılması üçün.
Əks göstərişlər
• Təsiredici maddələrə, preparatın digər komponentlərinə, sulfonamidlərə və ya beta-
adrenoblokatorlara qarşı fərdi yüksək həssaslıq.
• Bronxial astma və ya anamnezdə bronxial astma və ya ağciyərlərin ağır xroniki obstruktiv
xəstəlikləri də daxil olmaqla tənəffüs yollarının reaktiv xəstəlikləri.
• Sinus bradikardiyası, sinus düyününün zəifliyi sindromu, II-III dərəcəli atrioventrikulyar blokada,
sinoatrial blokada, kəskin ürək çatışmazlığı, kardiogen şok.
• Hiperxloremik asidoz.
• Ağır allergik rinit.
• Ağır böyrək çatışmazlığı.
Xüsusi göstərişlər və ehtiyat tədbirləri
Yerli istifadə edilən digər oftalmoloji vasitələr kimi, brinzolamid və timolol sistem şəkildə sorulur.
Timolol, beta-adrenergik blokator olduğu üçün, sistem beta-adrenergik blokatorların istifadəsi zamanı
təzahür olunan kardiovaskulyar, ağciyər və digər əlavə təsirlərə oxşar əlavə təsirlər müşahidə edilə bilər.
Preparatın sistem absorbsiyasını nəzərə alaraq, bütün sulfonamid törəmələrinə xas olan hiperhəssaslıq
reaksiyaları AZARQA istifadə edən xəstələrdə də baş verə bilər. Ciddi reaksiya əlamətləri və ya
hiperhəssaslıq əmələ gəldikdə, preparatdan istifadə dayandırılmalıdır.
Peroral karboanhidraza inhibitorlarının qəbulu zamanı turşu-qələvi balansının pozulması qeyd
edilmişdir. Metabolik asidoz riskinin olma ehtimalını nəzərə alaraq, böyrək funksiyasının pozulması
riski olan xəstələrdə ehtiyatla istifadə olunmalıdır.
Buynuz qişası zədəli olan (xüsusilə, endotelial hüceyrələri az olan) xəstələrdə, brinzolamidin endotelial
funksiyada mümkün rolu barədə tədqiqatlar aparılmayıb.
Karboanhidraza inhibitorları buynuz qişanın nəmlənməsini pozaraq, buynuz qişanın dekompensasiyası
və ödemə səbəb ola bilər. Buynuz qişası zədəli olan, xüsusilə şəkərli diabet və ya buynuz qişa
distrofiyası olan xəstələrdə diqqətli monitorinqin aparılması tövsiyə edilir.
Kardioloji pozulmalar
Ürək-damar xəstəlikləri (məsələn, ürəyin işemik xəstəliyi, Prinsmetal stenokardiyası və ürək
çatışmazlığı) və hipotenziya olan xəstələrdə beta - blokatorlarla müalicə əsaslı şəkildə dəyərləndirilməli
və digər aktiv maddələrlə müalicə nəzərdən keçirilməlidir. Ürək-damar xəstəlikləri olan xəstələr
simptom və əlamətlərin pisləşməsinə və əlavə təsirlərin yaranmasına görə nəzarət altında olmalıdırlar.
Birinci dərəcəli ürək blokadası olan pasiyentlərə ehtiyatla təyin edilməlidir.
Damar pozulmaları
Ağır periferik qan dövranı pozulmaları/xəstəlikləri (məs.: Reyno xəstıliyi və ya Reyno sindromu) olan
xəstələr ehtiyatla müalicə olunmalıdırlar.
Respirator pozulmalar
Bəzi oftalmoloji beta-blokatorların istifadəsindən sonra, astma xəstələrində bronxospazmla əlaqədar
ölüm də daxil olmaqla respirator reaksiyalar qeyd edilmişdir.
Hipoqlikemiya/diabet
Beta-adrenoblokatorları hipoqlikemiyaya meyilli və ya diabeti olan (xüsusilə labil gedişli diabet)
xəstələrə ehtiyatla təyin etmək lazımdır, çünki bu preparatlar kəskin hipoqlikemiya simptomlarını
gizlədə bilər.
Hipertiroidizm
Beta-blokatorlar həmçinin hipertireoidizm əlamətlərini gizlədə bilər.
Əzələ zəifliyi
Beta-adrenoblokatorların bəzi miastenik simptomlara (məs: diplopiya, ptozis və ümumi zəiflik) uyğun
olan əzələ zəifliyini gücləndirməsi barəsində qeydlər olmuşdur.
Digər beta-blokatorlar
Gözdaxili təzyiqə təsir və ya beta-blokadanın məlum təzahürləri, artıq sistem beta-blokatorları qəbul
edən xəstələrdə timololun istifadəsi zamanı güclənə bilər. Bu cür xəstələrdə cavab reaksiyasına ciddi
nəzarət olmalıdır. İki beta-blokatorun və ya iki yerli karboanhidraza inhibitorunun eyni zamanda
istifadəsi məsləhət görülmür.
Anafilaktik reaksiyalar
Atopiya və ya anamnezində müxtəlif allergenlərə qarşı ağır anafilaktik reaksiyaları olan xəstələrdə,
beta-blokatorlarla müalicə zamanı, bu cür allergenlərə qarşı təkrar reaksiya və anafilaktik reaksiyaların
müalicəsində istifadə edilən adrenalinin adi dozalarına qarşı rezistentlik yarana bilər.
Xoroidal qopma
Xoroidal qopma (gözün damar qişasının laylanması) timolol, asetazolamid kimi suda həll olunmuş
supressantların istifadəsi zamanı filtrasiya prosedurundan sonra müşahidə olunmuşdur.
Cərrahi anesteziya
Oftalmoloji beta-blokatorlar məsələn, adrenalinin sistem beta-aqonist təsirlərini bloklaya bilər.
Anestezioloqlar, xəstələrdə timololun istifadəsi ilə əlaqədar xəbərdar olmalıdırlar.
Kontakt linzalar
Benzalkonium-xlorid kontakt linzalarla təmasa girdikdə linzalar tərəfindən absorbsiya olunur və onların
rəngini dəyişir. Preparatın yumşaq linzalarla təmasına yol verilməməlidir. Buna görə də xəstələrə
preparatı istifadə etməzdən əvvəl linzaları çıxarmaları və istifadədən sonra linzaların yenidən taxılması
üçün ən azı 15 dəqiqə gözləmələri tövsiyə edilməlidir.
Digər dərman vasitələri ilə qarşılıqlı təsiri
AZARQA dərman vasitəsinin tərkibindəki karboanhidraza inhibitoru olan brinzolamid, yerli istifadə
edilsə də, sistem şəkildə absorbsiya olunur. Peroral karboanhidraza inhibitorlarının istifadəsi zamanı
turşu-qələvi balansının pozulması qeyd olunmuşdur. AZARQA istifadə edən xəstələrdə qarşlıqlı
təsirlərin olma ehtimalı nəzərə alınmalıdır.
Peroral karboanhidraza inhibitorları ilə birgə brinzolamid göz damcısı istifadə edən xəstələrdə
karboanhidrazanın inhibə olunmasının məlum sistem təsirlərinə əlavə effektlərin olması ehtimalı var.
Tərkibində brinzolamid olan göz damcıları ilə peroral karboanhidraza inhibitorlarının yanaşı istifadəsi
tövsiyə edilmir.
CYP3A4 inhibitorları ilə eyni vaxtda təyini zamanı ehtiyatlı olmaq lazımdır.
Beta-adrenoblokatorların sistem təsirinin güclənməsi (ürək vurmalarının tezliyinin aşağı düşməsi,
depressiya) CYP2D6 inhibitorları (xinidin, fluoksetion, paroksetin) və timololun eyni vaxtda istifadəsi
zamanı inkişaf edə bilər.
Timololun peroral kalsium kanallarının blokatorları, beta-adrenoblokatorlar, antiritmik preparatlar
(amiodaron daxil olmaqla), ürək qlikozidləri və parasimpatomimetiklər ilə eyni zamanda istifadəsi
zamanı hipotenziv təsirin və/ və ya aydın ifadə edilmiş bradikardiyanın güclənmə ehtimalı vardır.
Oftalmoloji beta-blokatorlar və adrenalinin (epinefrin) yanaşı istifadəsi zamanı bəzən midriaz halları
haqqında qeydlər olmuşdur.
Beta-blokatorlar diabetəleyhinə vasitələrin hipoqlikemik təsirini gücləndirə bilər.
Klonidin ilə eyni vaxtda istifadəsi zamanı ehtiyatlı olmaq lazımdır.
Hamiləlik və laktasiya dövründə istifadəsi
Hamiləlik
AZARQA, göz damcısı, suspenziyanın yerli istifadəsinin insanlarda hamiləliyə təsirini dəyərləndirəcək
tədqiqatlar aparılmamışdır. Siçovullarda və ya dovşanlarda peroral yeridilən brinzolamid reproduktivlik
toksiklik göstərmiş və dölün bədən çəkisinin azalaması və siçovullarda inkişaf dəyişikliklərinin
artmasını göstərmişdir.
Epidemioloji araşdırmalarda malformativ (anadangəlmə) effektlər aşkar edilməmiş, lakin beta-
blokatorların peroral istifadəsindən sonra bətndaxili inkişaf geriləmələri müşahidə edilmişdir. Əlavə
olaraq, doğuşdan əvvəl beta-blokatorlardan istifadə edən anaların körpələrində, beta-blokadanın əlamət
və simptomları (məs: bradikardiya, hipotenziya, tənəffüs çatışmazlığı və hipoqlikemiya) qeyd
edilmişdir. Hamiləlik zamanı tam zərurət olmadığı halda AZARQA dərman vasitəsi istifadə
edilməməlidir. Əgər doğuşdan əvvəl AZARQA istifadə edilərsə, o zaman yeni doğulmuş körpələrə
doğuşdan sonra ilk bir neçə gün ərzində nəzarət etmək lazımdır.
Laktasiya
Heyvanlar üzərində aparılan tədqiqatlarda brinzolamidin peroral istifadədən sonra südə keçməsi qeyd
edilmişdir. Oftalmoloji brinzolamidin insanlarda südə keçməsi məlum deyildir. Ana südünə keçən
betablokatorlar, südəmər körpələrdə ciddi əlavə təsirlərin yaranmasına səbəb ola bilər.
Südəmər körpə üçün risk istisna edilə bilməz. Laktasiyanın körpə üçün faydası və ana üçün terapiyanın
faydası nəzərə alınaraq, laktasiyanın dayandırılması və ya Azarqa ilə müalicədən imtina qərarı
verilməlidir.
Fertillik
AZARQA, göz damcısının yerli istifadəsinin insanlarda fertilliyə təsirini dəyərləndirəcək araşdırmalar
aparılmayıb. Qeyri-klinik məlumatlar brinzolamid və ya timololun peroral istifadədən sonra kişilərdə və
ya qadınlarda fertilliyə təsirini əks etdirmir. AZARQA-nın istifadəsində kişi və ya qadın fertilliyinə təsir
ehtimal edilmir.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Müvəqqəti bulanıq görmə və ya digər görmə pozulmaları avtomobilin idarə edilməsi və ya
mexanizmlərdən istifadə qabiliyyətinə təsir edə bilər.
Preparatın istifadəsindən sonra görmədə bulanıqlıq yaranarsa, xəstə görmə aydınlaşmayana qədər
avtomobil idarə etməməli və mexanizmlərdən istifadə etməməlidir. Karboanhidrazanın inhibitorları əqli
dəqiqlik və/və ya fiziki koordinasiyaya mənfi təsir göstərə bilər.
İstifadə qaydası və dozası
Preparatın dozası - gözün konyunktival kisəciyinə gündə 2 dəfə 1 damcı damızdırılır.
Uşaqlar
18 yaşından aşağı uşaqlarda preparatın təhlükəsizlik və effektivliyinə dair kifayət qədər məlumat
olmadığı üçün, bu qrup xəstələrdə AZARQA-nın istifadəsi tövsiyə edilmir.
Qaraciyər və böyrək funksiyasının pozulması
Qaraciyər və ya böyrək funksiyasının pozulması olan xəstələrdə AZARQA dərman vasitəsinin istifadəsi
öyrənilməmişdir. Ağır qaraciyər çatışmazlığı zamanı ehtiyatla istifadə edilməlidir. Ağır böyrək
çatışmazlığı zamanı preparatın istifadəsi əks göstərişdir.
Yaşlı xəstələr
Digər yetkin yaşlı xəstələrlə müqayisədə, yaşlı xəstələrdə preparatın təhlükəsizlik və effektivliyinə dair
ümumi fərqlilik müşahidə edilməmişdir.
İstifadə qaydası
Dərman vasitəsi yalnız yerli istifadə üçündür. İstifadədən əvvəl flakonu yaxşı çalxalamaq lazımdır.
Damcıtökənin və məhlulun çirklənməsinin qarşısını almaq üçün damcıtökənin ucluğunu göz
qapaqlarına, ətraf nahiyələrə və ya digər səthlərə toxundurmaq olmaz.
Hər istifadədən sonra flakonu kip bağlamaq lazımdır.
Sistem əlavə təsir riskinin azaldılması üçün preparatı istifadə etdikdən sonra gözün daxili bucağı
nahiyəsinə preparatın instilyasiyasından sonra 1-2 dəqiqə ərzində barmaqla yüngül basmaq tövsiyə
olunur – bu, preparatın absorbsiyasını azaldır. Nəticədə sistem əlavə təsirlər azalar və preparatın yerli
təsiri arta bilər.
Birdən artıq yerli oftalmoloji preparat təyin edildikdə, preparatlar ən azı 5 dəqiqə fasilə ilə istifadə
edilməlidir. Göz məlhəmləri ən axırda istifadə edilir.
Əgər doza buraxılıbsa, müalicəni növbəti doza ilə cədvəl üzrə davam etdirmək lazımdır.
Doza gözün konyunktival kisəsinə gündə 2 dəfə 1 damcıdan artıq olmamalıdır.
Flakonun qapağını açdıqdan sonra, flakonun kənarındakı halqa boşalarsa, dərman vasitəsinin
istifadəsindən əvvəl halqanı çıxarmaq lazımdır.
Əlavə təsirləri
Aşağıda göstərilən əlavə təsirlər AZARQA dərman vasitəsi ilə aparılan klinik tədqiqatları zamanı
müşahidə olunub və göstərilən tezlik meyarlarına görə təsnif edilmişdir: çox tez-tez (≥ 1/10), tez-tez (≥
1/100-dən <1/10-dək), bəzən (≥1/1,000-dən <1/100-dək), nadir hallarda (≥1/10,000-dən <1/1,000-dək)
və çox nadir hallarda (<1/10,000).
Doza həddinin aşılması
Preparatın təsadüfi udulması zamanı, doza həddinin aşılması simptomlarına bradikardiya, hipotenziya,
ürək çatışmazlığı və bronxospazma aid edilə bilər.
Preparatın brinzolamid tərkibi ilə əlaqədar olaraq, elektrolit balansının pozulması, asidozun inkişafı,
mərkəzi sinir sistemində pozğunluqlar əmələ gələ bilər.
Elektrolitlərin (xüsusilə kalium) və qanın рН-nın səviyyəsini nəzarətdə saxlamaq lazımdır.
Buraxılış forması
5 ml göz damcısı, dairəvi qeyri-şəffaf (ağ) aşağı sıxlıqlı polietilen (LDPE) flakonda. 1 flakon, içlik
vərəqə ilə birlikdə karton qutuya qablaşdırılır.
Saxlanma şəraiti
30°С –dən aşağı temperaturda və uşaqların əli çatmayan yerdə saxlamaq lazımdır.
Yararlılıq müddəti
2 il.
Yararlılıq müddəti bitdikdən sonra istifadə etmək olmaz.
Flakon ilk dəfə açdıqdan sonra 4 həftə ərzində istifadə edilməlidir.
Aptekdən buraxılma şərti
Resept əsasında buraxılır.
İstehsalçı
S.A. Alkon-Kuvre N.V,
Rijksveq 14
В-2870 Puurs, Belçika.
Qeydiyyat vəsiqəsinin sahibi
Novartis Farma AQ, İsveçrə.
Azərbaycan Respublikası ərazisində dərman vasitəsi ilə əlaqədar hər hansı bir məlumat almaq
üçün yerli filialla və ya əlavə təsirlərə şübhə olduğu zaman drugsafety.cis@novartis.com elektron
ünvanına müraciət edərək əlaqə saxlamağınız xahiş olunur:
Novartis Farma Servises AQ şirkətinin Azərbaycan Respublikasındakı Filialı.
AZ1014, Bakı şəhəri, Rəsul Rza küçəsi 75, “Winter Park Plaza”.
Telefon: +994 12 505 5822, +994 12 5055833.
Elektron ünvan: baku.info@novartis.com